Reshjet e dendura të dëborës kanë përkeqësuar ndjeshëm situatën e qarkullimit në aksin Përrenjas – Qafë Thana, duke krijuar radhë kilometrike dhe bllokim për më shumë se tre orë për drejtuesit që kthehen nga Korça. Pavarësisht përdorimit të gomave dimërore, qarkullimi ka qenë thuajse i pamundur për shumë mjete.
Pamjet e siguruara tregojnë vargun e gjatë të automjeteve të ndaluara në këtë aks nacional, ku shoferët e kanë ndërprerë lëvizjen për shkak të rrezikut për dalje nga rruga. E gjithë rruga nga Pogradeci deri në Prrenjas dhe më tej mbetet e bllokuar, duke e bërë të pamundur lëvizjen normale.
Banorët lokalë kërkojnë ndërhyrje urgjente nga autoritetet për të shmangur përkeqësimin e situatës dhe për të garantuar qarkullimin e sigurt.
Sipas Autoritetit Rrugor Shqiptar, aksi Pogradec – Qafë Thana është aktualisht një nga segmentet më problematike, veçanërisht për turistët që largohen nga juglindja drejt Tiranës. Ndërkohë, borëpastrueset po përballen me vështirësi të mëdha për të mbajtur rrugët të kalueshme, pasi trashësia e borës dhe ngricat e natës po pengojnë pastrimin dhe kriposjen efektive të rrugëve.
Reshjet e dëborës vijojnë të rëndojnë situatën në juglindje të vendit, duke e bërë të nevojshme reagimin e shpejtë të institucioneve përgjegjëse për të garantuar sigurinë e qytetarëve dhe normalizimin e qarkullimit.