Prokuroria e Posaçme (SPAK), Agjencia e Mbikëqyrjes Policore (AMP) dhe Policia e Shtetit kanë zhvilluar një operacion të gjerë në disa qytete të Shqipërisë, duke ekzekutuar 10 masa sigurie të lëshuara nga Gjykata e Posaçme Kundër Korrupsionit dhe Krimit të Organizuar (GJKKO).
Operacioni, i përqendruar në goditjen e grupeve kriminale të përfshira në trafik droge, përfshiu kontrolle në Tiranë, Kukës, Fier, Vlorë dhe Gjirokastër.
Arrestimet në radhët e policisë
Nga 10 masat e sigurimit të ekzekutuara, 4 kanë qenë për oficerë të policisë. Tre efektivë janë arrestuar, ndërsa një tjetër është shpallur në kërkim.
Lexo edhe:
- Shkëlzen Ruska, shefi i Krimeve në Himarë, u arrestua me akuza për kultivim kanabisi, pjesëmarrje në grup kriminal të strukturuar, shpërdorim detyre dhe veprime të tjera të kryera nga organizata kriminale.
- Ervis Alisinanaj, shefi i Krimeve në Komisariatin e Lushnjës, akuzohet për të njëjtat vepra penale, si dhe për ushtrim të ndikimit të paligjshëm ndaj funksionarëve publikë.
- Elvis Dervishi, shefi i Komisariatit të Policisë Kufitare në Sarandë, është shpallur në kërkim. Ai akuzohet për trafik narkotikësh, pjesëmarrje në grup të strukturuar kriminal, kryerjen e veprave penale nga organizata kriminale dhe shpërdorim detyre.
- Erdit Hazizaj, ish-efektiv policie i larguar nga forcat e rendit në vitin 2022, është arrestuar për trafik droge, kultivim bimësh narkotike dhe përfshirje në grupe kriminale.
Operacioni i SPAK ka shënjestruar bashkëpunimin midis zyrtarëve të rendit dhe grupeve kriminale, duke sinjalizuar një tjetër goditje ndaj korrupsionit në radhët e policisë. Hetimet po vijojnë për të zbardhur më tej aktivitetin e grupit dhe lidhjet e tyre me elementë të tjerë kriminalë.