Kryeministri i Hungarisë, Viktor Orban, ka deklaruar se Serbia, Maqedonia e Veriut dhe Mali i Zi duhet të kenë përparësi në zgjerimin e Bashkimit Evropian (BE), duke lënë jashtë Shqipërinë dhe Ukrainën.
Gjatë një interviste për “Radio Kossuth”, Orban kritikoi procesin e përshpejtuar të anëtarësimit të Ukrainës, duke theksuar se kjo do të kishte pasoja ekonomike serioze për Hungarinë. Ai theksoi se vendet e Ballkanit Perëndimor janë më të përshtatshme për anëtarësim në BE, ndërsa Serbia, sipas tij, mund të pranohej menjëherë, duke sjellë avantazhe të mëdha, sidomos për Hungarinë.
Pozicioni i Shqipërisë në procesin e anëtarësimit
Deklarata e Orban-it përjashton Shqipërinë nga përparësitë e zgjerimit të BE-së, pavarësisht përpjekjeve të saj për të avancuar në procesin e integrimit. Kjo sjell një sfidë të re diplomatike për Tiranën, e cila kërkon mbështetje nga vendet anëtare për të vijuar negociatat e anëtarësimit.
Ky qëndrim i kryeministrit hungarez ka ngritur reagime dhe shqetësime në qarqet politike evropiane, pasi vjen në një moment kyç për politikën e zgjerimit të BE-së dhe balancën e saj në Ballkanin Perëndimor.