Sinodi i Shenjtë ka zgjedhur Joan Pelushin si Kryepeshkop të ri të Kishës Ortodokse Autoqefale të Shqipërisë, duke pasuar Anastas Janullatos. Emërimi i tij u prit me emocion nga besimtarët, ndërsa ceremonia e fronëzimit do të mbahet më 29 mars.
Rruga drejt besimit ortodoks
Joan Pelushi ka lindur në janar 1956 në Tiranë, në një familje me besim bektashian. Në vitin 1975, gjatë vitit të maturës, ai u konvertua në fenë ortodokse pasi një mik i tij i huazoi një kopje të Dhiatës së Re në frëngjisht.
Ai ndoqi studimet në Holy Cross Orthodox School of Theology në Boston, SHBA, ku përfundoi studimet me Master në Teologji. Studimet e tij në SHBA u mundësuan nga një bursë e themeluar nga shqiptarët e Amerikës në nder të Peshkop Fan Nolit.
Karriera dhe kontributi në Kishën Ortodokse Shqiptare
Pas përfundimit të studimeve, Joan Pelushi u kthye në Shqipëri dhe u emërua pedagog në Akademinë Teologjike të Kishës Ortodokse Shqiptare. Në 27 shkurt 1994, ai u hirotonis si dhjak dhe më 4 dhjetor të po atij viti u shugurua prift. Në vitin 1995, ai u rikthye në SHBA për studime të mëtejshme, por pas kthimit të tij në Shqipëri në vitin 1996, u caktua drejtor i Seminarit Teologjik në Durrës dhe mori titullin Arkimandrit.
Në vitin 1998, ai u zgjodh Mitropoliti i Korçës, një rol që e mbajti për më shumë se dy dekada, duke u bërë një ndër figurat më të rëndësishme të Kishës Ortodokse në vend.
Kontributi në botime dhe studime teologjike
Kryepeshkopi i ri ka një kontribut të gjerë akademik, duke përkthyer dhe botuar disa libra me temë teologjike:
- Mbi Shpirtin e Shenjtë (1996)
- Besimi Ortodoks (4 vëllime, 1997-2002)
- Shën Siluani (2003)
- Dogmatika (tekst akademik)
- Shenjtorët iliro-shqiptarë
Gjithashtu, ai ka botuar artikuj në gazetën “Ngjallja”, ka marrë pjesë në konferenca shkencore brenda dhe jashtë vendit dhe ka ndihmuar në botimin e revistës “Tempulli”.
Sfida e re si Kryepeshkop
Zgjedhja e Joan Pelushit si Kryepeshkop i Kishës Ortodokse Shqiptare vjen në një moment kur Kisha po përballet me sfida të ndryshme, nga raportet me Greqinë e deri te ruajtja e pronave të saj. Në një intervistë të vitit 2013, ai deklaroi:
“Vazhdimisht jemi sulmuar, shpesh pa të drejtë. Çdo ditë na vjedhin kisha dhe ne shpesh kemi heshtur. Në kishë nuk mësohet greqisht, siç pretendohet. Një fakt i tillë vlen vetëm për zonat minoritare, dhe është e drejta e tyre të mësojnë në gjuhën e tyre.”
Duke qenë një figurë e njohur për përkushtimin e tij ndaj Kishës dhe për mbrojtjen e autoqefalisë shqiptare, mbetet për t’u parë se si ai do të udhëheqë Kishën Ortodokse Shqiptare në vitet në vijim.