Kreu i Lëvizjes BASHKË, Arlind Qori, ka reaguar ndaj kritikave për mungesën e pasurisë personale dhe stilin e tij të thjeshtë të jetesës, duke e kthyer këtë në një manifest politik për vlerat që përfaqëson. Në një intervistë për RTSH, Qori theksoi se nuk matet jeta e mirë me pasuri, por me dinjitet, solidaritet dhe angazhim për një shoqëri më të drejtë.
“Jetoj me qira, lëviz me autobus, kam libra dhe një kafe kur dua”
I pyetur për faktin që nuk ka shtëpi apo makinë personale, Qori u përgjigj:
“Kam një strehë mbi kokë, një familje të shëndetshme, libra dhe një kafe sa herë dua. Për mua, jeta e realizuar nuk është luksi, por përmbushja me vlerat, idealet, artin dhe kulturën.”
Ai theksoi se përfaqëson atë pjesë të popullsisë që jeton pa privilegje, duke e cilësuar jetën e tij të përditshme si një shembull të qartë të kauzës që përfaqëson Lëvizja BASHKË.
“Ne nuk vijmë nga planeti Mars, jemi si ju”
Qori bëri thirrje për një politikë të ndershme, larg pasurimit personal dhe premtimeve boshe. “Ne nuk jemi të jashtëzakonshëm, jemi qytetarë si të gjithë, që besojmë se diçka mund të ndryshojë,” deklaroi ai.
Prioritet: Të drejtat e punëtorëve dhe zbatimi i Kodit të Punës
Në intervistë, Qori theksoi se Lëvizja BASHKË është e vetmja forcë politike që flet për të drejtat e punëtorëve, duke kritikuar neglizhencën e shtetit ndaj kësaj shtrese jetike të shoqërisë.
“Kodi i Punës është ligji më pak i zbatuar në Shqipëri,” tha ai, duke kërkuar respekt për sigurinë dhe jetën e punëtorëve, si dhe përmirësim të kushteve të punës.
“Shqipëria nuk vuan nga mungesa e parasë, por nga mungesa e respektit për punën”
Në përmbyllje, Qori bëri një apel për rikthimin e dinjitetit për njerëzit e punës, duke theksuar se kapitalet dhe resurset ekzistojnë, por ajo që mungon është vullneti politik për t’i vënë në shërbim të shumicës.