
Shqipëria dhe Izraeli nga sot janë më afër se kurrë më parë, pasi kanë nisur fluturimet ajrore të rregullta tre herë në javë mes Tiranës dhe Tel Avivit, përmes kompanisë izraelite Sundor Airlines.
Pasagjerët e parë mbërritën në agim në Aeroportin e Tiranës, ku u pritën me ceremoni nga përfaqësues të lartë të TIA-s dhe Autoritetit të Aviacionit Civil Shqiptar.
Lidhje ajrore me ndikim në turizëm dhe ekonomi
Drejtori operativ i TIA-s, Piervittorio Farabbi, e cilësoi këtë linjë si një “urë miqësie” që nuk lidh vetëm dy vende, por edhe dy popuj me histori dhe kulturë të pasur.
Maksim Et’hemaj, drejtues i Autoritetit të Aviacionit Civil Shqiptar, tha se Sandor El Al është një operator prestigjioz dhe kjo linjë pritet të rrisë fluksin turistik, duke i dhënë një impuls të ri marrëdhënieve ekonomike mes dy vendeve.
Ambasadorja e Izraelit: Lidhje fizike dhe shpirtërore
Ambasadorja izraelite në Tiranë, Galit Peleg, theksoi se kjo linjë përforcon lidhjet e veçanta që ekzistojnë mes dy vendeve dhe e cilësoi fluturimin e drejtpërdrejtë si një hap të madh drejt rritjes së bashkëpunimit turistik, kulturor dhe ekonomik.
Fluturime të rregullta për udhëtarë, turistë dhe biznes
Linja ajrore do të operojë me 3 fluturime në javë, duke përmirësuar ndjeshëm qasjen mes dy vendeve, si për turizëm ashtu edhe për qëllime biznesi apo lidhje komunitare.
Kjo nismë përfaqëson një tjetër hap konkret drejt forcimit të marrëdhënieve dypalëshe, me ndikim të drejtpërdrejtë në sektorin e turizmit, ekonomisë dhe diplomacisë publike.