Pesë muaj pas tragjedisë që i mori jetën 14-vjeçarit Martin Cani, nëna e tij ka folur me zërin që i dridhej në emisionin Top Story, duke zbuluar se familja e autorit të krimit nuk i ka kërkuar ende falje, as nuk ka ofruar ndihmë njerëzore apo mbështetje emocionale.
“Ai e ka në jetë fëmijën e tij, unë jo,” – tha ajo mes lotësh, duke i bërë thirrje drejtësisë që autori të marrë dënimin që meriton dhe që “të gjitha hallkat që dështuan të parandalojnë tragjedinë të mbajnë përgjegjësi.”
“Asnjë ndihmë psikologjike, asnjë thirrje nga shkolla”
Nëna e Martinit theksoi mungesën e reagimit institucional:
“Nuk na është ofruar asnjë ndihmë psikologjike. Asnjëherë nuk na mori në telefon shkolla kur kishte konflikt mes fëmijëve. Do e kisha marrë përsipër, do ta ndaloja.”
“Mos kërkoni ulje dënimi për atë që ma vrau djalin”
Ajo denoncoi përpjekjet për të lehtësuar përgjegjësinë e autorit:
“Kërkojnë ulje dënimi! Jo! Nuk pranoj. Dua të marrë atë që meriton. Përndryshe, nuk vij më këtu.”
Tragjedia që nuk duhet të përsëritet
Ngjarja, që u bë edhe subjekt reflektimi në dokumentarin “Adolescence”, tregon sesi rrjetet sociale, mungesa e ndërhyrjes në kohë nga institucionet dhe braktisja emocionale e të rinjve mund të çojnë në fund tragjik.
Martin Cani nuk jeton më. Autori është në burg. Një tjetër i mitur është i plagosur. Por trauma e një kombi mbetet e hapur.