Kryeministri Edi Rama është vënë sërish në qendër të kritikave për mungesën e ujit të pijshëm në Durrës, një nga qytetet më të mëdha dhe më të rëndësishme turistike të vendit. Një koment i qytetarit në rrjetet sociale, i cili e akuzoi Ramën për mospranim të realitetit, nxiti reagimin e kryeministrit që, në vend të përgjegjësisë, zgjodhi të përsërisë justifikimin klasik: “Shkop magjik nuk kam”.
60 milionë euro investime, por ende pa ujë 24 orë në ditë
Rama pretendon se janë investuar 60 milionë euro në 3 mandate qeverisëse, duke theksuar se zona si Spitalla, Porto Romano dhe ish-Këneta tashmë kanë ujë 24 orë në ditë. Por pjesa tjetër e qytetit furnizohet vetëm 4 deri në 20 orë në ditë, ndërsa plazhi i Durrësit – që pret mijëra turistë çdo verë – ka arritur vetëm në 7-8 orë ujë në ditë.
“Sukses” edhe për fshatrat: 2 deri në 4 orë furnizim
Kryeministri përmendi gjithashtu se 28 fshatra kanë ujë 24 orë, ndërsa 11 të tjerë furnizohen mesatarisht vetëm 2 deri në 4 orë në ditë, duke e paraqitur këtë si progres.
Projekt i ri, por premtimi shtyhet për mandatin e katërt
Për të përballuar krizën, Rama paralajmëroi një projekt të ri të financuar nga Agjencia Franceze për Zhvillim, i cili pritet të hyjë në realizim “brenda këtij viti”, me zgjidhje përfundimtare brenda mandatit të katërt. Në thelb, qytetarët që kanë duruar 12 vite pa ujë të vazhdueshëm, duhet të presin edhe më shumë.
“Nga 4 në 43 zona urbane me ujë 24 orë”, por Durrësi s’është një prej tyre
Rama pretendoi gjithashtu se Shqipëria ka kaluar nga vetëm 4 në 43 zona urbane me furnizim të plotë, por Durrësi, një qytet bregdetar strategjik, ende nuk e ka arritur këtë standard. Me gjithë borxhet dhe fondet e mëdha, qyteti ende nuk ka ujë të pijshëm 24/7.
Në vend që të kërkojë falje, Rama i drejtohet qytetarëve me thirrjen për të votuar më 11 maj. Por në vend të ujit në rubinet, ajo që sigurohet për momentin është rikthimi i pushtetit për një mandat të katërt – një pushtet që vazhdon të prodhojë më shumë justifikime se zgjidhje.