Atentati mafioz në zonën e Lundrës, që tronditi opinionin publik disa ditë më parë, ka marrë zhvillime të reja ndërsa 11-vjeçari i plagosur vijon të luftojë për jetën në spital. Ngjarja u raportua për herë të parë tre ditë më parë, por burime nga hetimi dhe dëshmi të reja kanë zbardhur një panoramë edhe më të errët të sulmit që ndodhi në rrugën që lidh Shijakun me Tiranën.
Gazetarja Klodiana Lala, e ftuar në “Opinion” në Tv Klan, zbuloi se autorët kishin përgatitur një pritë të mirëorganizuar. Ata ishin të pozicionuar në errësirë, mes ferrash, ndërsa një motor me dritat e ndezura në mes të rrugës shërbente si karrem për të ndaluar automjetin tip “G-Class” ku udhëtonin katër të rinjtë.
“Në momentin që automjeti po kalonte aty, autorët kanë qëlluar me breshëri kallashnikovi. Shoferi, i plagosur në të dyja duart, tentoi të shpëtonte duke shtuar shpejtësinë, por më pas humbi kontrollin dhe makina u përplas me një mur rrethues. Fëmijët që ishin në makinë filluan të bërtasin, dhe ndihma e parë u dha nga banorët e zonës,” – tregoi Lala.
Të rinjtë kishin ardhur nga një festë ditëlindjeje në Shijak dhe nuk ishin objektiva të drejtpërdrejtë të atentatit. Megjithatë, hetimet nuk kanë përjashtuar asnjë pistë, përfshirë edhe atë të ngatërrimit të shënjestrës. Burime nga grupi hetimor dyshojnë se sulmi mund të jetë kryer për llogari të një grupi kriminal, por motivi i saktë mbetet ende mister.
Reagimi institucional ka qenë i vonuar. Ministri i Brendshëm nuk ka dhënë ende një deklaratë publike, çka ka ngritur shqetësime për mungesën e përgjegjësisë në nivelet më të larta të sigurisë.
Ndërkohë, babai i të miturit ka deklaruar se “një minutë vonesë dhe djali nuk do të ishte më gjallë.” Ai ka rrëfyer se i ka çuar vetë fëmijët në spital, ndërsa mjekët vijojnë përpjekjet për të mbajtur gjallë 11-vjeçarin që ndodhej në sediljen e pasme të automjetit të qëlluar.
Hetimet vazhdojnë, ndërsa pamjet e kamerave të sigurisë, gëzhojat dhe gjurmët në vendngjarje po analizohen për të identifikuar autorët. Sipas burimeve nga policia, në vendin e ngjarjes janë gjetur dhjetëra gëzhoja arme automatike, duke treguar qartë qëllimin për të ekzekutuar çdo të pranishëm në makinë.
Ngjarja e Lundrës, tashmë në qendër të vëmendjes kombëtare, ka rikthyer në pah dështimet në kontrollin e territorit dhe mungesën e reagimit ndaj grupeve të armatosura që veprojnë të pashqetësuara në zona urbane.