Sekretari i Përgjithshëm i Partisë Demokratike, Flamur Noka, ka shpërthyer me akuza të rënda ndaj Suel Çelës, një personazh i shumëpërfolur në Elbasan, që sipas opozitës ka ndikim të fortë në strukturat e pushtetit vendor dhe zgjedhor.
Në një deklaratë publike nga qyteti i Elbasanit, Noka lëshoi një paralajmërim të qartë, duke akuzuar Suel Çelën për përpjekje për të kërcënuar komisionerët dhe mbështetësit e Partisë Demokratike përmes presionit dhe telefonatave të paligjshme.
“Mos tento të telefonosh as komisionerë dhe as demokratë sepse je duke bërë një krim më të shëmtuar se krimet që ke bërë,” – tha Noka, duke e quajtur Suel Çelën “kryebanditin e pushtetit” dhe duke e akuzuar se po mbron një “të vdekur politik” si Edi Rama, që sipas tij është në agoninë e fundit politike.
Thirrje për Rezistencë Qytetare
Flamur Noka i bëri thirrje qytetarëve të Elbasanit të dalin masivisht në zgjedhjet e 11 majit, duke i konsideruar këto si moment historik për të ndëshkuar ata që kanë mbajtur pushtetin përmes dhunës dhe shantazhit.
“Elbasani nuk mbahet me banda. Larg duart nga demokratët! Larg duart Suel, se nuk do të ketë qeli të errët që do të mbajë ty. Ta harrosh ti se mund të kërcënosh demokratët,” – u shpreh ai.
Ai theksoi se morali i opozitës është morali i shqiptarit të ndershëm dhe premtoi një fitore të padiskutueshme për Partinë Demokratike në Elbasan.
Mesazhi Final: Shqipëri Madhështore
Në fund të deklaratës, Noka bëri thirrje për unitet opozitar, duke u kërkuar qytetarëve që më 11 maj të votojnë Numrin 1 dhe liderin historik të PD-së, Sali Berishën, për të realizuar, siç tha ai, misionin për një “Shqipëri Madhështore”.
“Të gjithë në këmbë! Të vërshojmë drejt kutive të votimit dhe të votojmë për fitoren e të ndershmëve!”