Nga trajnimi i forcave elitare në Shqipëri, te menaxhimi i trafikantëve në Amerikën Latine – Zbardhet dosja tronditëse e Sky ECC
Një nga personazhet më të larta të strukturave elitare të shtetit shqiptar, Altin Morina, ish-drejtues i RENEA-s, rezulton i përfshirë thellë në një rrjet ndërkombëtar trafiku të kokainës, me degë nga Evropa deri në Ekuador. Sipas vendimit të zbardhur nga Gjykata e Posaçme, publikuar nga Syri.net, transkriptet e komunikimeve të tij përmes aplikacionit të koduar Sky ECC e përshkruajnë Morinën si një organizator me rol logjistik, që ndërmjetësonte ngarkesat e kokainës, siguronte marinar për anije, dhe kërkonte “shokë të sigurt” për shpërndarje në Amsterdam, Hamburg, Frankfurt dhe porte të tjera.
“Ortaku Im Do 20 Bukë” – Kodi i Drogës në Holandë
Më 8 shkurt 2021, Altin Morina i shkruan Ekil Ndërjakut për një porosi nga Holanda:
1UN9CQ (Altin Morina): “Ne Hollande kemi naj shok… që ka të bardhë… se do ortaku im 20 buk…”
5PNNS9 (Ekil Ndërjaku): “Me t’bardh…?”
1UN9CQ: “Të bardhë…”
SPNNS9: “Se di… s’jam ngatërru mo… po do pys…”
Fjala “bukë” përdorej si kod për pakot e kokainës, ndërsa “e bardhë” për substancën narkotike. Biseda tregon një rrjet të ngritur mirë të komunikimit të koduar, ku çdo kërkesë për ngarkesë kalohej përmes kontakteve të besueshme në çdo vend.
Transport Detar: Anije, Marinarë dhe Rrjet në Ekuador
Një tjetër bisedë më 29 dhjetor 2020, flet për koordinim të transportit të kokainës përmes rrugës detare nga Spanja drejt Ekuadorit:
1UN9CQ: “Me shkrujti një shok që kam në Ekuador… që kishte hipje dhe dalje andej… në Spanjë… e ta hedhi në det… por i duhet një marinar…”
5PNNS9: “Marinar… ku, atje në Ekuador?”
1UN9CQ: “Në Spanjë…”
5PNNS9: “Shok, folim nga afër…”
Altin Morina jo vetëm që komunikon me trafikantë për sasinë dhe cilësinë e drogës, por gjithashtu gjen njerëz të besuar për logjistikën detare, duke përforcuar rolin e tij si menaxher operativ i trafikut ndërkombëtar.
800 Qindëshe në Amsterdam dhe Mbledhje Borxhesh në Tiranë
Më herët, më 14 gusht 2020, Morina tregon se kishte kontaktuar me një furnitor që i kishte sqaruar sasinë e drogës:
“Malli thotë është 800 qindsh dhe 10 copë paska… co ndonjë shok me e pa… do tak ne shok se po vij për Durrës…”
Ndërkohë, në një bisedë të mëvonshme, Morina shkruan:
“Jam në Tiranë për të mbledhur borxhet… për ato që i kemi lanë pezull…”
Kjo tregon se ai mbante rol mbikëqyrës financiar mbi qarkullimin dhe arkëtimin e të ardhurave nga trafiku, duke përforcuar pozitën e tij brenda strukturës kriminale.
Lidhjet në Gjermani dhe Porte Strategjike
Një tjetër fragment i rëndësishëm i dosjes është komunikimi për porte strategjike në Gjermani:
1UN9CQ: “Fola pak me një shok në Gjermani, ka bërë një dalje… edhe mund të nisem unë andej… kemi rob ta heqi aty? Hamburg ose Frankfurt?”
SPNNS9: “Se di… nigjojmë çmimet iher… që t’folim me ropt…”
Ky dialog konfirmon se portet gjermane ishin pjesë e itinerarit të qarkullimit të kokainës, dhe Morina siguronte jo vetëm kontaktet por edhe analizën e çmimeve të tregut.
Një Rrjet Kriminal Brenda Uniformës
Altin Morina, i cili për vite me radhë kishte trajnuar forcat elitare të sigurisë shqiptare, sipas zbardhjes së Sky ECC, ka vepruar si një udhëheqës i heshtur i rrjeteve të kokainës në Evropë dhe Amerikën Latine. Ai përdorte kodime të sofistikuara dhe lidhje të forta njerëzore për të siguruar që “bukët” të lëviznin pa u kapur, ndërsa zhvillonte operacione nën hundën e institucioneve.