Athinë – Një ngjarje tronditëse me tiparet e një rrëmbimi mafioz ka ndodhur më 6 maj në kryeqytetin grek, ku djali 24-vjeçar i një biznesmeni u rrëmbye dhe u torturua për 5 orë nga katër persona, mes tyre edhe këngëtari i njohur Ivan Greko.
Sipas autoriteteve greke, tre prej agresorëve e sulmuan fizikisht të riun në zonën e Ymittos, duke e goditur me një objekt të mprehtë në gjymtyrë dhe duke e kërcënuar me jetë përpara se ta fusnin me forcë në një automjet.
Gjatë mbajtjes peng, autorët i kërkuan viktimës 25 mijë euro dhe një motoçikletë, ndërsa përdorën armë zjarri dhe mjete të mprehta për ta frikësuar dhe torturuar. Ai u detyrua të telefononte miqtë për të mbledhur shumën e kërkuar, ndërsa u përball me përpjekje për t’i prerë gishtat me prerës hekuri – një akt i ndërprerë vetëm falë rezistencës së viktimës.
Pas pesë orësh dhune fizike dhe psikologjike, i riu arriti të shpëtonte dhe të njoftonte një mik të tij, duke e çuar çështjen te autoritetet. Autorët kishin marrë me vete 740 euro para të gatshme, çelësat e makinës së tij dhe një orë luksoze me vlerë nga 20,000 deri në 29,000 euro. Pas ngjarjes, ata vazhduan ta kërcënonin përmes mesazheve dhe videove në aplikacione online.
Në mbrëmjen e 22 majit, policia greke organizoi një operacion të koordinuar në tri zona të Athinës, duke arrestuar të katër të dyshuarit. Sipas mediave vendase, rasti klasifikohet si një “rrëmbim tigri”, një metodë ku viktima mbahet peng për të përfituar para në mënyrë të shpejtë dhe pa lënë gjurmë të menjëhershme në polici.
Ngjarja ka tronditur opinionin publik në Greqi, jo vetëm për dhunën e përdorur, por edhe për përfshirjen e një personazhi të njohur të showbiz-it si Ivan Greko, duke ngritur pyetje mbi lidhjet e tij me botën e krimit të organizuar.