Partia Demokratike – Koalicioni “Aleanca për Shqipërinë Madhështore” ka depozituar një ankim zyrtar pranë Komisionit të Ankimimeve dhe Sanksioneve (KAS), duke kërkuar shpalljen të pavlefshme të zgjedhjeve në qarqet Vlorë dhe Gjirokastër, si pjesë e një procesi të kontestuar zgjedhor.
Në kërkesën e saj, PD akuzon për përdorim sistematik të administratës publike dhe strukturave shtetërore në funksion të Partisë Socialiste. Sipas opozitës, zgjedhjet në këto dy qarqe u karakterizuan nga shkelje të rëndësishme të neutralitetit institucional dhe barazisë elektorale, me nëpunës publikë të përfshirë në mënyrë aktive në fushatën elektorale.
“Kryetarët e bashkive dhe drejtues të institucioneve lokale që janë njëkohësisht figura të PS-së, kanë ushtruar presion dhe kanë përdorur burime publike për të ndikuar votuesit në favor të kandidatëve të Partisë Socialiste,” thuhet në dokumentin ankimor.
PD e ka cilësuar procesin si një “masakër zgjedhore”, dhe paralajmëron se numri i qarqeve ku do të kërkohet pavlefshmëri mund të rritet në ditët në vijim.
Ky është një zhvillim i rëndësishëm në klimën paszgjedhore të 11 majit, teksa vërehen përpjekje nga opozita për të kundërshtuar rezultatin në rrugë institucionale, ndërkohë që tensionet politike janë në rritje në mbarë vendin.