Skema e ndikimit të paligjshëm për punësime në administratë përfshin të afërmin e një zyrtari të PS-së
Një dosje hetimore e regjistruar në SPAK me nr. 586 ka zbuluar një tjetër rast të ndikimit të paligjshëm për përfitime personale përmes emërimeve në administratë. Në qendër të kësaj dosjeje ndodhet shtetasi Dritan Lleshi, i njohur gjithashtu si Dritan Ndreca, i cili rezulton të jetë djali i xhaxhait të zyrtarit të Partisë Socialiste, Plarent Ndreca.
Sipas dosjes hetimore, Dritan Ndreca është marrë i pandehur nga Prokuroria e Posaçme, nën akuzën për “Ushtrim të ndikimit të paligjshëm ndaj personave që ushtrojnë funksione publike”, dhe rrezikon një dënim me 8 muaj burgim.
Premtime për punësim me pagesë: 4 milionë lekë për një vend inspektori
Sipas hetimeve të SPAK, Dritan Ndreca i ka premtuar shtetasit Arjan Ndoni se kundrejt shumës prej 4 milionë lekë të vjetra, do të punësonte djalin e tij, Eljo Ndoni, si inspektor mjedisi në qytetin e Fierit.
Në bisedat mes tyre, i pandehuri ka thënë se këtë punësim mund ta siguronte përmes “vëllait” të tij, Plarent Ndreca, i cili në vitin 2020 mbante detyrën e Sekretarit të Përgjithshëm në Ministrinë e Brendshme. SPAK po verifikon nëse zyrtari është implikuar drejtpërdrejt në skemë, por deri tani hetimi është fokusuar tek ndërmjetësi.
Dokumente, kapar dhe premtime të pambajtura
Dëshmia e Arjan Ndonit përpara hetuesve tregon se fillimisht Dritan Ndreca i kërkoi 2 milionë lekë të vjetra në formë kapari, të cilat ia ka dorëzuar. Po ashtu, i janë dorëzuar dokumentet e shkollës së të birit, ndërsa Ndreca ka premtuar se do të bënte vetë aplikimin në Tiranë.
Fillimisht u premtua se punësimi do të bëhej në qershor, më pas u shty për në shtator, dhe më pas për në nëntor. Asnjë nga premtimet nuk u mbajt, dhe Arjan Ndoni ka nisur të kërkojë kthimin e shumës së dhënë.
Pas disa muajsh mashtrimesh, Ndoni ka vendosur të bëjë kallëzim penal në Policinë e Fierit, duke akuzuar Dritan Ndrecën për mashtrim dhe ushtrim të ndikimit të paligjshëm.
SPAK përmbyll hetimin: Dritan Ndreca del për gjykim
Çështja kaloi në duart e SPAK, që ka mbledhur provat e nevojshme për ngritjen e akuzës dhe ka vendosur të marrë të pandehur Dritan Lleshin alias Ndreca. Dosja është në prag të gjykimit, dhe i pandehuri rrezikon 8 muaj burgim.
Ndërkohë, nuk dihet nëse SPAK do të hetojë më thellë lidhjet e pretenduara me zyrtarin socialist Plarent Ndreca, apo nëse ai do të thirret si dëshmitar në proces.