Italia po përballet me shpërthimin më të madh të virusit të Nilit Perëndimor në Evropë, duke u kthyer në vatrën më të nxehtë të këtij infeksioni që transmetohet nga mushkonjat. Vetëm këtë javë, dy persona të moshuar kanë humbur jetën në rajonin e Lazios, duke e çuar në dymbëdhjetë numrin e viktimave në këtë zonë.
Viktimat e fundit në Lazio
Një burrë 84-vjeçar nga Latina, i cili vuante nga leuçemia limfocitike, ndërroi jetë në spital pasi testet pas vdekjes konfirmuan praninë e virusit. Viktima tjetër, një grua 87-vjeçare nga Cassino, me probleme të shumta shëndetësore, mbërriti në urgjencë më 17 gusht dhe ndërroi jetë një ditë më pas. Mjekët thonë se pacientët e moshuar dhe ata me sëmundje kronike janë më të rrezikuarit.
Italia, epiqendra e shpërthimit
Sipas ECDC (Qendra Evropiane për Parandalimin dhe Kontrollin e Sëmundjeve), Italia ka raportuar 274 raste të konfirmuara që nga fillimi i sezonit, duke përfaqësuar mbi 80% të 335 rasteve të regjistruara në tetë vende të BE-së. Numri i përgjithshëm i viktimave ka arritur në 19. Pas Italisë, më të prekurat janë Greqia me 35 raste, Serbia me 9, Franca me 7, Rumania me 6, Hungaria me 2, si dhe Bullgaria e Spanja me nga një rast.
Pse po përhapet më shumë virusi?
Ekspertët paralajmërojnë se rastet do të rriten ndjeshëm në javët e ardhshme, me një kulm të pritshëm midis fundit të gushtit dhe shtatorit. Ndryshimi i klimës, me vera më të gjata dhe dimra më të butë, po krijon kushte ideale për mushkonjat që mbartin virusin, duke zgjatur periudhën e transmetimit dhe duke shtuar rrezikun për shpërthime më të shpeshta.
Alarm edhe për sëmundje të tjera
Përveç virusit të Nilit, ECDC raporton se Evropa po përballet edhe me një rekord të ri të infeksioneve me chikungunya, me 27 shpërthime në kontinent, përfshirë 111 raste në Francë dhe 7 në Itali.
Drejtoresha e ECDC-së, Pamela Rendi-Wagner, paralajmëroi:
“Evropa po hyn në një fazë të re, ku sëmundjet e transmetuara nga mushkonjat po bëhen normë. Duhet vigjilencë më e lartë dhe masa parandaluese urgjente.”
Ky zhvillim i fundit e vendos shëndetin publik të Evropës përballë një sfide të re, ku mushkonjat po shndërrohen në armikun më të rrezikshëm të qytetërimit modern.