Policia e Gjirokastrës ka hedhur dritë mbi vrasjen e biznesmenit italian Edoardo Sarchi, i cili u ekzekutua në orët e para të së shtunës në zonën e Salarisë, Tepelenë. Pas hetimeve intensive, autoritetet kanë identifikuar si autor të dyshuar Kamber Sulçajn, 48 vjeç, nga fshati Mesaplik i Vlorës, i cili tashmë është shpallur në kërkim.
Konflikt banal që përfundoi me armë
Sipas hetimeve, ngjarja nisi si një konflikt verbal për motive të dobëta mes Sarchit, shoqëruesve të tij dhe autorit të dyshuar. Më pas, Sulçaj ka qëlluar me çifte me vjaska, duke hapur zjarr ndaj grupit dhe automjeteve të tyre. Si pasojë, 44-vjeçari italian humbi jetën në vend.
Provat e gjetura nga policia
Policia ka sekuestruar një sërë provash që e lidhin autorin me krimin:
- Makinën dhe veshjet që Sulçaj kishte përdorur, të fshehura në një stan malor midis fshatrave Nivicë dhe Bolenë.
- Një çantë me dylbi infra e termike, mbajtëse arme dhe elektrik dore.
- Në banesën e tij dhe të familjarëve u gjetën 2.5 milionë lekë në lekë e euro, 3 armë gjahu, municion luftarak, 450 fara kanabisi dhe dy kasaforta të mbyllura.
Hetimet në vijim
Materialet i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër. Policia e Gjirokastrës dhe e Vlorës, në bashkëpunim me Departamentin e Policisë Kriminale, po vijojnë punën për kapjen e Sulçajt.
Ngjarja ka tronditur opinionin publik, duke shtuar dyshimet për rrethana të tjera të fshehta pas vrasjes së një biznesmeni të njohur italian, i cili kishte vite që jetonte dhe investonte në Shqipëri.