Një ngjarje tragjike ka tronditur Italinë, pasi tre pjesëtarë të karabinierisë italiane humbën jetën dhe 13 të tjerë u plagosën gjatë një shpërthimi të fuqishëm në qytetin Castel d’Azzano, pranë Veronës, ndërsa autoritetet po përpiqeshin të ekzekutonin një urdhër përmbarimor.
Sipas hetimeve paraprake, dy vëllezër dhe motra e tyre kishin mbushur ndërtesën me gaz, duke përgatitur një kurth për policinë. Shpërthimi ndodhi në momentin që autoritetet hapën derën e shtëpisë, konfirmoi guvernatori i rajonit, Luca Zaia, për televizionin Sky TG24.
Koloneli Claudio Pagano, komandant i karabinierëve të Veronës, e përshkroi ngjarjen si një “gjest krejtësisht të çmendur”, ndërsa ministri i Brendshëm Matteo Piantedosi deklaroi se kjo ishte “një tragjedi e vërtetë”.
Tre autorët e dyshuar – Dino Ramponi (63 vjeç), Franco Ramponi (65 vjeç) dhe Maria Luisa Ramponi (59 vjeç) – u arrestuan më vonë në zonën rurale, pasi tentuan të largoheshin nga vendi i shpërthimit. Dino dhe Maria Luisa pësuan plagë nga shpërthimi dhe ndodhen nën kujdes mjekësor.
Autoritetet konfirmuan se kjo ishte herë e dytë që tentonin përmbarimin e familjes Ramponi, e cila kishte zaptuar ndërtesën që një vit më parë. Tentativa e parë ishte ndërprerë, pasi vëllezërit kishin kërcënuar të shpërthenin shtëpinë, gjë që më pas u bë realitet.
Ndërtesa dykatëshe u shkatërrua plotësisht nga shpërthimi. Kryeministrja italiane Giorgia Meloni dhe ministri i Mbrojtjes Guido Crosetto shprehën ngushëllimet e tyre për humbjen e tre karabinierëve, të cilët u vlerësuan si heronj në detyrë.