Prokuroria e Posaçme Kundër Korrupsionit dhe Krimit të Organizuar (SPAK) ka regjistruar zyrtarisht emrin e zëvendëskryeministres dhe ministres së Infrastrukturës dhe Energjisë, Belinda Balluku, si person nën hetim për akuzën e shkeljes së barazisë në tendera.
Burime nga drejtësia kanë bërë të ditur se Balluku është thirrur të paraqitet të hënën në SPAK, mbi bazën e një fletëthirrjeje të firmosur nga prokurori i posaçëm Dritan Prençi. Dokumenti i është dorëzuar ministres në ambientet e Ministrisë së Infrastrukturës dhe Energjisë dhe parashikon që ajo të jetë e shoqëruar nga një avokat, çka zakonisht sinjalizon se mund t’i komunikohet akuzë penale.
Hetimi dhe procedura
Hetimi ndaj Ballukut lidhet me dyshime për parregullsi në procedurat e tenderimit publik, veçanërisht në projektet madhore të Ministrisë së Infrastrukturës dhe Energjisë. Një prej çështjeve kryesore është tuneli i Llogarasë, ku vlera e kontratës është rritur me mbi 50 milionë euro pas dhënies së tenderit kompanisë fituese turke.
Sipas burimeve, SPAK pritet të ushtrojë ndjekje penale pa kërkuar masë sigurie, duke shmangur kështu nevojën për autorizim nga Kuvendi i Shqipërisë. Ky veprim tregon se hetimi është në një fazë të avancuar, por ende nuk ka kërkesë për arrestim apo pezullim nga detyra.
Qëndrimi i SPAK dhe rezervimi zyrtar
Zyrtarisht, SPAK ka deklaruar për mediat se “nuk ka asgjë për të ndarë me publikun në këtë fazë të hetimit”, duke ruajtur sekretin hetimor. Megjithatë, burime të sigurta konfirmojnë se ndaj Ballukut janë depozytuar disa kallëzime penale, përfshirë ato që lidhen me Aeroportin e Vlorës, ARRSH-në dhe OSHEE-në, të cilat po shqyrtohen paralelisht.
Pasojat politike të hetimit
Nëse Balluku paraqitet të hënën në SPAK, ajo do të përballet për herë të parë drejtpërdrejt me një procedurë hetimore si zyrtare e nivelit më të lartë në qeverinë aktuale. Ende nuk është e qartë nëse ajo do të vijojë detyrën, apo do të zgjedhë dorëheqjen për të ndjekur procesin si qytetare e lirë.
Belinda Balluku mban postin e zëvendëskryeministres që nga korriku i vitit 2022 dhe të ministres së Infrastrukturës dhe Energjisë që nga janari 2019. Ajo është gjithashtu drejtuese politike e qarkut Fier, ku në zgjedhjet e fundit fitoi 12 mandate parlamentare për Partinë Socialiste.