Reshjet intensive të natës dhe të mëngjesit të së dielës kanë shkaktuar përmbytje të gjera në Nën-Shkodër dhe në bashkinë Vau Dejës, duke vënë nën presion infrastrukturën dhe komunitetet lokale. Situata më e rënduar raportohet në Vau Dejës, ku rreth 100 banesa janë me prezencë uji, ndërsa lumi Glinë ka dalë nga shtrati, duke përmbytur oborre, bodrume dhe segmente rrugore.
Kryebashkiaku i Vau Dejësit, Kristjan Shkreli, pas inspektimeve në terren, konfirmoi se gjendja mbetet e vështirë dhe kërkon ndërhyrje të vijueshme për menaxhimin e ujërave dhe rikthimin e aksesit në zonat e prekura. Për shkak të reshjeve të dendura, Ashtë, Kosmaç dhe Barbullush janë pa energji elektrike.
Edhe në bashkinë Shkodër gjendja është problematike. Në njësitë administrative Gur i Zi dhe Berdicë, uji ka depërtuar në disa banesa, ndërsa Harku i Berdicës është sërish nën ujë, duke rikthyer një problem të vjetër të drenazhimit në aksin e ri rrugor. Në zonat malore, reshjet kanë shoqëruar rrëshqitje gurësh dhe inertesh në rrugët rurale, me prezencë uji në disa akse që vështirësojnë qarkullimin. Fshatrat turistike Razma dhe Boga raportohen pa energji elektrike, duke ndikuar te bizneset e vogla dhe akomodimet familjare.
Autoritetet vendore dhe strukturat e emergjencave po punojnë për devijimin e ujërave, pastrimin e kanaleve kulluese dhe stabilizimin e furnizimit me energji, ndërsa u bëhet thirrje banorëve të shmangin lëvizjet e panevojshme në akset e përmbytura dhe të raportojnë menjëherë çdo rrezik në banesë apo në infrastrukturë.Reshjet e dendura kanë prodhuar një valë të re përmbytjesh në Shkodër dhe Vau Dejës, me dhjetëra familje të prekura, ndërprerje energjie dhe dëmtime të infrastrukturës. Vëmendja kryesore mbetet te menaxhimi i prurjeve, mbrojtja e banesave dhe rihapja e akseve për të garantuar lëvizjen dhe shërbimet bazë.
Reshjet e dendura kanë prodhuar një valë të re përmbytjesh në Shkodër dhe Vau Dejës, me dhjetëra familje të prekura, ndërprerje energjie dhe dëmtime të infrastrukturës. Vëmendja kryesore mbetet te menaxhimi i prurjeve, mbrojtja e banesave dhe rihapja e akseve për të garantuar lëvizjen dhe shërbimet bazë.