Taulant Toma, 41 vjeç, i dënuar deri në vitin 2048, ka tronditur sërish autoritetet italiane. Prej mëngjesit të së dielës, ai është shpallur në kërkim kombëtar, pasi ka arritur të arratiset nga burgu i sigurisë së lartë Opera në Milano — një prej institucioneve më të blinduara në Itali.
Si ndodhi arratisja
Sipas të dhënave paraprake, Toma ka prerë hekurat e dritares së qelisë së tij, është ngjitur në oborrin e brendshëm dhe më pas ka kapërcyer murin perimetral duke u zhdukur pa lënë gjurmë. Alarmit iu dha rreth orës 08:00, kur gjatë kontrollit rutinë gardianët konstatuan se qelia ishte bosh.
Hetuesit po analizojnë pamjet e kamerave të sigurisë për të rindërtuar lëvizjet e tij dhe për të kuptuar nëse ka pasur ndihmë nga brenda apo jashtë burgut.
“Ekspert i arratisjeve”: Kush është Taulant Toma
Toma, me precedentë penalë për grabitje, vjedhje dhe trafik droge, njihet prej vitesh si një ndër të burgosurit më problematikë dhe më të vështirë për t’u mbajtur në kontroll në sistemin penitenciar italian. Arratisja e sotme është e katërta në “karrierën” e tij.
- Arratisja e parë (2009): Nga burgu i Ternit. U kap dy muaj më vonë në një shtëpi fshati në Pavia.
- Arratisja e dytë (2013): Nga burgu i Parmës, bashkë me një tjetër të dënuar.
- Kapja dhe arratisja e tretë: Pas arrestimit në Belgjikë, arriti të zhdukej sërish për disa muaj, deri në rikapjen e tij në vitin 2015.
Edhe pse është ri-arrestuar çdo herë, ai ka treguar njohuri teknike dhe aftësi të jashtëzakonshme për të shfrytëzuar dobësitë e sistemit të sigurisë.
Kërkim në shkallë të gjerë
Forca të shumta policore dhe njësi të specializuara po kërkojnë në të gjithë zonën e Milanos dhe përreth burgut. Autoritetet italiane nuk e fshehin shqetësimin: arratisja e një të dënuari me profil të tillë nga një burg i kategorisë më të lartë konsiderohet dështim i rëndë operacional.
Arratisja e Taulant Tomës i bashkohet një serie episodësh që kanë vënë në pikëpyetje sigurinë e burgjeve italiane, ndërsa kërkimi për të pritet të intensifikohet nga ora në orë.