Një ngjarje e rëndë është shënuar pasditen e sotme në Portin e Durrësit, ku një marinar i ri humbi jetën gjatë kryerjes së detyrave të punës. Viktima është identifikuar si Avaz Yafarov, 24 vjeç, me kombësi nga Azerbajxhani, pjesë e ekuipazhit të anijes tregtare “Kyebele”, e cila ishte e ankoruar në kalatën nr. 2 dhe po kryente procesin e shkarkimit të grurit.
Detajet e ngjarjes
Sipas burimeve zyrtare, i riu ka rënë në kontakt me rrymën elektrike gjatë punimeve në bord. Ndihma e dhënë menjëherë nga ekipi i anijes dhe shërbimet portuale nuk ka mjaftuar për t’i shpëtuar jetën. Ai është transportuar me urgjencë drejt Spitalit të Durrësit, por ka ndërruar jetë rrugës.
Njoftimi zyrtar i Policisë
Policia bëri me dije se rreth orës 17:50 është marrë sinjalizimi për incidentin fatal. Viktima, i regjistruar me iniciale J. A., marinar në një anije me flamur të Panamasë, dyshohet të ketë humbur jetën si pasojë e kontaktit të drejtpërdrejtë me energjinë elektrike.
Aktualisht, grupi hetimor ndodhet në vendngjarje dhe po punon për të sqaruar rrethanat e plota të aksidentit, duke hetuar procedurat e sigurisë, kushtet e punës dhe përgjegjësitë e mundshme.