Kryeministri Edi Rama ka përdorur një intervistë në median britanike për të dhënë leksione mbi Brexit-in, për të treguar se kush e ka frymëzuar politikisht dhe për të shpërndarë vlerësime për figura të kampit laburist e konservator në Britani. Në qendër të deklaratave të tij ishin Tony Blair, Margaret Thatcher dhe kritikat ndaj rrjeteve sociale.

Brexit, sipas Ramës, e ka futur Britaninë në rrugë të gabuar
Në intervistën për gazetën britanike “The Independent”, Rama e përshkroi gjendjen politike në Britaninë e Madhe si më të vështirë se në pjesën tjetër të Europës pas daljes nga Bashkimi Europian.
Sipas versionit të tij, Brexit ishte një rrugë vetëshkatërruese dhe mbetet për t’u parë nëse drejtimi i ri politik në Londër do të mund të ndryshojë kursin e vendit.
Tony Blair, figura që thotë se e shtyu drejt politikës
Rama deklaroi se ndikimin më të madh në formimin e tij politik e ka pasur ish-kryeministri britanik Tony Blair dhe projekti i New Labour.
Ai tha se, po të mos ekzistonin Blair dhe New Labour, me shumë gjasa nuk do të ishte frymëzuar për të hyrë në politikë. Sipas Ramës, ajo që e tërhoqi ishte qasja pragmatike dhe tentativa për të kapërcyer ndarjet tradicionale mes së majtës dhe së djathtës.
Vlerësime edhe për Thatcher dhe Andy Burnham
Në të njëjtën intervistë, kreu i qeverisë shqiptare shprehu admirim edhe për Margaret Thatcher, ndonëse vjen nga kampi socialist. Ai argumentoi se transformimet politike në Britani gjatë periudhës së saj ishin të rëndësishme.
Rama foli gjithashtu me tone vlerësuese për Andy Burnham, për të cilin tha se ka një tërheqje të veçantë politike dhe se përvoja në qeverisjen vendore mbetet fusha reale e përballjes politike.
Rrjetet sociale në shënjestër
Një tjetër pjesë e intervistës iu kushtua ndikimit të platformave sociale në demokraci. Rama ngriti shqetësimin se këto platforma po ushqejnë ekstremizmin, teoritë konspirative dhe propagandën.
Sipas tij, problemi nuk lidhet vetëm me lirinë e shprehjes, por me mënyrën se si shpërndahet përmbajtja dhe si arrin ajo te publiku, duke ndikuar drejtpërdrejt në funksionimin e demokracive.
Deklaratat vijnë në një moment kur Rama po projekton gjithnjë e më shpesh profil ndërkombëtar përtej debatit të brendshëm, duke komentuar zhvillime të vendeve të tjera dhe duke u pozicionuar për çështje që shkojnë përtej politikës shqiptare.
Në këtë rast, fokusi i tij ishte Britania: nga Brexit-i te Blair, nga Thatcher te rrjetet sociale, me një intervistë që më shumë se sa zbulon të reja për Londrën, tregon mënyrën se si kryeministri shqiptar zgjedh të paraqesë veten në arenën ndërkombëtare.
