Teksa Franca po përgatitet të përfundojë bllokimin e vendit në 11 maj, qeveria ka botuar një listë datash për rihapjen graduale të jetës publike, raporton The Guardian.
Të gjitha do të varen nga përhapja e virusit. Nëse ka ende shumë raste, kufizimet e bllokimit nuk do të lehtësohen. Në çdo rast, vendimet se ku të lehtësohen kufizimet do të merren në konsultim me autoritetet lokale dhe do të ndryshojnë sipas rajoneve.
30 prill: Kreu i autoritetit shëndetësor, Jérôme Salomon do të fillojë të japë të dhëna për virusin në secilin rajon. Këto të dhëna do të përdoren për të vendosur se ku do të lehtësohen kufizimet e bllokimit dhe ku mund të vazhdojnë.
7 maj: Në varësi të vendit ku virusi “po qarkullon”, rajonet do të përcaktohen “jeshile”, dhe do tu hiqen kufizimet në 11 maj, ose “të kuq” atje ku nuk mund të hiqen.
11 maj: Maska do të jenë të disponueshme për publikun e gjerë. Dyqanet dhe bizneset do të rihapen, por jo qendrat tregtare.
Transporti publik do të jetë i disponueshëm, por maska do të jetë e detyrueshme dhe gjysma e vendeve në trena, metro, tramvaje dhe autobusë do të lihen bosh për të mbajtur distancën sociale.
Stafi i kopshtit dhe shkollës fillore do të kthehen në punë për t’u përgatitur për rihapjen e institucioneve. Vendet e adhurimit mund të rihapen, por nuk do të mbahet asnjë shërbim si dhe do të rihapen më parë në zonat ”jeshile”.
12 maj: Rifillon hapja e çerdheve dhe shkollave fillore, me grupe jo më të mëdha se 10 fëmijë dhe pa asnjë kontakt mes tyre.
18 maj: Hapen dy shkollat e mesme. Klasa me 15 nxënës maksimalisht, maska të detyrueshme për nxënës dhe profesorë, dhe xhel dore të jenë të disponueshme gjerësisht në shkolla.
Maj / qershor: Do merret vendimi për hapjen e bareve, kafeneve, restoranteve, kinemave dhe institucioneve kulturore.
2 qershor: Lehtësimi ose shtrëngimi i mëtejshëm i kufizimeve do të vendoset në varësi të pranisë dhe përhapjes së koronavirusit në tre javët e mëparshme./bota.al/