Ish-deputeti i Partisë Demokratike, Dashnor Sula, nuk do të jetë më kandidat për deputet në listën e koalicionit “Nisma Shqipëria Bëhet”, pavarësisht se një ditë më parë kishte konfirmuar pjesëmarrjen e tij në zgjedhjet e 11 majit nën këtë sigël.
Burime pranë negociatave bëjnë me dije se palët nuk arritën një marrëveshje përfundimtare, duke bërë që Sula të tërhiqet nga gara. Megjithatë, sipas Kodit Zgjedhor, partitë politike apo koalicionet zgjedhore kanë ende disa ditë për të bërë ndryshime në listat e kandidatëve.
Nga konfirmimi te tërheqja
Vetëm një ditë më parë, Sula kishte shpërndarë një mesazh në rrjetet sociale ku njoftonte pjesëmarrjen e tij në zgjedhjet e 11 majit si kandidat i “Nisma Shqipëria Bëhet”, duke falënderuar drejtuesit e koalicionit për mundësinë e dhënë. Ai kishte deklaruar mbështetjen e tij të palëkundur për SPAK, duke theksuar se nuk do të ndalonte përpjekjet për të pastruar politikën shqiptare nga korrupsioni.
Reagimi i Sali Berishës
Pas largimit të Sulës nga Partia Demokratike, kreu i PD-së, Sali Berisha, komentoi vendimin e tij, duke e cilësuar një rreshtim me opozitën e opozitës dhe një patericë për Edi Ramën.
“Mbrojtja e kryeministrit është puthja e Judës për Dash Sulën. Ai ka karrierën e tij, por të rreshtohet me opozitën e opozitës nuk është zgjidhja,” tha Berisha, duke e konsideruar këtë lëvizje si një gabim strategjik.
Ndërsa nuk ka ende një deklaratë të re nga Sula për të sqaruar tërheqjen e tij, ky zhvillim lë të hapur mundësinë e rikthimit të tij në një tjetër formacion politik ose një pauzë të përkohshme nga jeta parlamentare.