Një tjetër goditje ka përfshirë administratën e Donald Trump pas rrjedhjes masive të të dhënave personale të anëtarëve të kabinetit të tij, që përfshijnë numra telefoni, fjalëkalime dhe adresa emaili, të publikuara në internet. Skandali, i pagëzuar si ‘Signal’, u zbulua fillimisht nga revista gjermane Der Spiegel, duke tronditur themelet e sigurisë kombëtare amerikane.
Sipas raportimit, këshilltarë të lartë si Mike Waltz (siguri kombëtare), Pete Hegseth (mbrojtje) dhe Tulsi Gabbard (inteligjencë kombëtare) kanë përdorur aplikacionin Signal për të diskutuar planet për sulme ajrore në Jemen, duke përfshirë detaje top-sekret për objektivat Houthi. Madje, në një rast, Waltz përfshiu pa dashje edhe një gazetar në grupin e komunikimit.
“Numrat e telefonit dhe fjalëkalimet e tyre janë gjetur në dhjetëra databaza të hakuara,” – raporton Der Spiegel, duke shtuar se të dhënat janë të disponueshme në internet dhe janë përdorur për llogari në platforma si WhatsApp, Dropbox dhe LinkedIn.
Revista zbulon se adresa e emailit e Hegseth është ekspozuar në mbi 20 rrjedhje të dhënash, dhe numri i tij ka qenë aktiv në WhatsApp deri pak ditë më parë. Të njëjtën situatë përjetuan edhe Gabbard dhe Waltz, të cilët rezultojnë të kenë përdorur pajisje potencialisht të infektueshme nga spyware.
Trump, në reagimin e tij të parë publik, mbrojti Hegseth dhe e quajti skandalin “një tjetër gjueti shtrigash”, duke shmangur përgjegjësinë e administratës së tij.
“Ai nuk kishte lidhje me këtë,” – deklaroi ish-presidenti amerikan, ndërsa nuk dha shpjegime për rrezikimin e ushtarëve amerikanë që marrin pjesë në operacionet e Lindjes së Mesme.
Nëse konfirmohet se komunikimet janë përgjuar, kjo do të përbënte një prej shkeljeve më të rënda të sigurisë kombëtare në historinë moderne të SHBA-së, duke hapur rrugë për ndërhyrje të mundshme të agjenturave të huaja në strategjinë ushtarake të vendit.
Këshilli i Sigurisë Kombëtare reagoi duke thënë se fjalëkalimet dhe llogaritë e përmendura janë ndryshuar që prej vitit 2019, por raportet sugjerojnë se disa prej të dhënave janë përdorur aktivisht deri në mars 2025.
Ndërkohë, mediat evropiane dhe amerikane paralajmërojnë se skandali mund të thellohet, pasi hetimet vijojnë mbi rrjedhjen e informacionit dhe përdorimin e platformave të pasigurta për çështje të sigurisë kombëtare.