Trupi i Rayyan Alwan, 24-vjeçares palestineze e cila u vra me thikë në Tiranë nga i ati Fadi Alwan, vijon të qëndrojë në morgun e Tiranës, ndërkohë që nëna e saj pritet të mbërrijë në Shqipëri për të dhënë dëshmi lidhur me krimin e rëndë.
Burime pranë Policisë së Tiranës bëjnë me dije se familjarët nuk kanë bërë ende kërkesë për tërheqjen e trupit, ndërkohë që nëna e të ndjerës ka komunikuar me autoritetet shqiptare dhe ka konfirmuar ardhjen e saj për të dëshmuar personalisht mbi motivet që mund të kenë çuar në aktin fatal.
Rayyan Alwan u gjet e pajetë më 27 shkurt, në një banesë me qira në rrugën Gjon Muzaka në Tiranë, ndërsa nga hetimet paraprake u zbulua se babë e bijë kishin mbërritur në Shqipëri më 19 shkurt. Vetëm tre ditë më vonë, më 22 shkurt, Fadi Alwan u largua nga vendi në drejtim të Greqisë, më pas udhëtoi për në Amsterdam dhe aktualisht dyshohet se fshihet në Liban.
Sipas dëshmive, viktima dhe autori kishin fjetur në një shtrat dhe fillimisht ishin prezantuar si çift, duke nxitur dyshime për një marrëdhënie jashtë normave familjare. Më vonë, autoritetet gjermane konfirmuan se ata ishin babë e bijë.
Vrasja dyshohet të ketë ndodhur mes datave 19–22 shkurt, ndërsa trupi u zbulua vetëm pas ndërhyrjes së pronarit të banesës, i cili njoftoi policinë për mungesën e lëvizjes.
Ngjarja ka shkaktuar tronditje të madhe, jo vetëm për përmbajtjen makabre, por edhe për mënyrën e organizimit të udhëtimit dhe tentativën për fshehjen e autorit jashtë territorit shqiptar.