Vatikani zbulon amanetin e fundit të Papës: një varr i thjeshtë dhe një lutje për paqen në botë
Testamenti i Papa Françeskut u publikua këtë të diel nga zyra e shtypit e Vatikanit, duke ndriçuar për herë të parë dëshirën e tij të fundit: një ceremoni varrimi e përulët dhe një prehje pa lavdi, në tokë, pa zbukurime.
“Franciscus” mbi varr dhe asgjë më tepër
Në dokumentin e nënshkruar më 29 qershor 2022 në rezidencën Santa Marta, Papa Bergoglio kërkon që trupi i tij të varroset në Bazilikën Papale të Santa Maria Maggiore, në një vend që ai e kishte zgjedhur vetë: kamaren mes Kapelës Pauline dhe Kapelës Sforza. Pa dekorime, pa përmendore. Vetëm një mbishkrim i thjeshtë: “Franciscus”.
Kujtim nën mbrojtjen e Zonjës së Bekuar
Në letrën testamento, Papa Françesku shkruan:
“Gjithmonë ia kam besuar jetën time dhe shërbesën time meshtarake e peshkopale Nënës së Zotit tonë, Marisë Më të Shenjtë. Uroj që udhëtimi im i fundit tokësor të përfundojë pikërisht në këtë shenjtërore të lashtë.”
Një bamirësi mbulon shpenzimet
Bergoglio nënvizon se shpenzimet për varrimin e tij janë të mbuluara nga një bamirësi e rezervuar enkas për këtë qëllim, duke ia lënë përkujdesjen Imzot Rolandas Makrickas, Komisioner i Jashtëzakonshëm i Kapitullit Liberian.
Përfundimi: një lutje për njerëzimin
Në fund të testamentit, Papa shpreh mirënjohje për ata që e kanë dashur dhe lutur për të:
“Vuajtjet që u bënë të pranishme në pjesën e fundit të jetës sime ia ofrova Zotit për paqe në botë dhe vëllazëri mes popujve.”
Ky dokument përmbledh gjithë frymën e përulësisë, dashurisë për njerëzimin dhe shërbesës që karakterizoi pontifikatin e Papës Françesku, Papës së popullit.