Një aksident i rëndë është regjistruar mëngjesin e sotëm në qytetin e Elbasanit, ku një automjet ka dalë nga rruga dhe ka përfunduar brenda një lokali pranë kryqëzimit që lidh stadiumin “Elbasan Arena” me Parkun “Rinia”. Ngjarja ndodhi rreth orës 07:55, duke shkaktuar panik dhe dëme të mëdha materiale.
Si pasojë e përplasjes, dy persona që ndodheshin brenda lokalit janë plagosur rëndë dhe janë transportuar me urgjencë në Spitalin Rajonal të Elbasanit, ku po marrin trajtim mjekësor.
Aktualisht shkaqet e aksidentit nuk janë bërë ende të ditura. Policia ndodhet në vendngjarje dhe ka nisur hetimet për të zbardhur rrethanat që çuan në këtë aksident.
Ngjarja ka sjellë shqetësim tek banorët e zonës, pasi vendi ku ndodhi përplasja është një nga zonat më të frekuentuara të qytetit në orët e mëngjesit, sidomos nga qytetarët që shfrytëzojnë Parkun “Rinia”.
Autoritetet u bëjnë thirrje drejtuesve të mjeteve për kujdes të shtuar në zonat urbane, ndërsa pritet informacion zyrtar për gjendjen shëndetësore të të plagosurve dhe përgjegjësinë për aksidentin.