SPAK ka përfunduar hetimet dhe ka dërguar për gjykim në Gjykatën e Posaçme kundër Korrupsionit dhe Krimit të Organizuar (GJKKO) dosjen ndaj ish-shefit të Policisë Rrugore, Roven Zeka, i akuzuar për korrupsion pasiv në bashkëpunim.
Sipas hetimeve, Zeka, së bashku me dy efektivët e policisë, Sokol Novaku dhe Edison Tabaku, kanë kërkuar dhe përfituar 2 mijë euro nga një qytetare për të mos e arrestuar pas një aksidenti rrugor. Në dosje përfshihen gjithashtu edhe Ergest Vrioni dhe Bledi Belba, të cilët akuzohen për veprat penale të “korrupsionit pasiv” dhe “aktiv të personave që ushtrojnë funksione publike”.
SPAK thotë se grupi vepronte në mënyrë të koordinuar, duke kërkuar pagesa për të shmangur ndëshkime ligjore ose për të zbutur masat ndaj personave të ndaluar. Hetimet kanë provuar komunikime të drejtpërdrejta mes të pandehurve dhe personave që kërkonin ndërhyrje për çështje administrative dhe penale.
Çështja do të shqyrtohet nga gjyqtarja Irena Gjoka, ndërsa për Zekën dhe efektivët e tjerë kërkohet dënim për shpërdorim detyre dhe korrupsion në kuadër të ushtrimit të funksioneve publike.
Kjo është një tjetër çështje që SPAK e çon në gjykim pas një sërë hetimesh të ngjashme ndaj zyrtarëve të lartë të policisë, duke përforcuar fushatën kundër korrupsionit institucional dhe abuzimit me detyrën në radhët e administratës së rendit publik.