Bilall Kasami, kandidati i koalicionit VLEN, ka shpallur fitoren në zgjedhjet për komunën e Tetovës, duke marrë një mandat të dytë si kryetar bashkie. Në një postim në rrjetet sociale, Kasami falënderoi qytetarët për besimin dhe theksoi se “Tetova ka folur qartë për ndryshimin dhe vazhdimësinë e reformave”.
Reagimi i rivalit
Rivali i tij, Bajram Rexhepi nga Allianca Kombëtare për Integrim (AKI), pranoi publikisht humbjen dhe i uroi Kasamit punë të mbarë në mandatin e ri.
“Të dashur miq, gara zgjedhore në Tetovë mbaroi. Qytetarët e thanë fjalën e vet. Unë uroj kundërkandidatin dhe i uroj punë të mbarë. Përgjegjësia për këtë rezultat është krejtësisht e imja dhe e askujt tjetër. Zoti na ndihmoftë”, – deklaroi Rexhepi në një reagim zyrtar.
Një fitore simbolike për opozitën shqiptare
Fitorja e Kasamit shihet si një goditje për BDI-në e Ali Ahmetit, që për dekada ka dominuar politikën lokale në Maqedoninë e Veriut. Ky rezultat i jep një tjetër shtysë forcës opozitare VLEN, e cila tashmë pretendon të ketë fituar shumicën e komunave me popullsi shqiptare në vend.
Zgjedhjet e 2 nëntorit në Tetovë janë vlerësuar si një test politik për balancat e reja në kampin shqiptar të Maqedonisë së Veriut, ndërkohë që qyteti mbetet një qendër strategjike për zhvillimet e ardhshme politike.