Qytetarë të shumtë u mblodhën këtë të enjte para godinës së Kuvendit për të kundërshtuar projektligjin për barazinë gjinore, që pritet të shqyrtohet për miratim në seancë plenare. Protestuesit, të pajisur me pankarta dhe slogane të forta, kërkuan mosmiratimin e ligjit, duke e cilësuar atë si “një kërcënim ndaj familjes tradicionale”.
“Deputetë, mos votoni kundër fëmijëve”, “Projektligji i barazisë gjinore, anti-familje”, dhe “Largoni duart nga fëmijët”, ishin disa nga mesazhet që dominuan në pankarta, ndërsa thirrjet u shoqëruan me kore të vazhdueshme ndaj mazhorancës.
Protesta, e cila nisi në orët e paradites, solli në bulevard grupe të ndryshme qytetarësh, organizata fetare dhe përfaqësues të shoqatave që mbrojnë familjen tradicionale. Sipas tyre, projektligji synon të imponojë koncepte të huaja për shoqërinë shqiptare dhe cenon të drejtën e prindërve për edukimin e fëmijëve.
Ndërkohë, burime nga Kuvendi bëjnë me dije se debatet parlamentare pritet të jenë të tensionuara, pasi projektligji ka ndarë edhe deputetët e vetë mazhorancës. Kundërshtarët e tij e quajnë nismën “të nxituar dhe pa konsultim publik”, ndërsa përkrahësit argumentojnë se ajo përfaqëson një hap të rëndësishëm drejt respektimit të barazisë gjinore dhe mbrojtjes nga diskriminimi.
Në të njëjtën kohë, në rrjete sociale po zhvillohet një debat i gjerë mbi mënyrën si qeveria po trajton çështjet e identitetit dhe rolit të familjes në shoqërinë shqiptare. Përballë Kuvendit, megjithatë, jehona ishte e qartë: një protestë e fortë qytetare që kërkon ndalimin e menjëhershëm të ligjit.