Një ngjarje e rëndë ka tronditur mbrëmjen e së dielës qytetin e Elbasanit, ku biznesmeni 43-vjeçar Edmond Mëhalla, i njohur edhe si Edmond Hyka, është ekzekutuar me armë zjarri pranë biznesit të tij në Unazën Jugore.
Sipas raportimeve, ngjarja ka ndodhur në afërsi të një karburanti në pronësi të viktimës. Mëhalla ndodhej brenda automjetit të tij kur dy autorë të maskuar, sipas të dhënave paraprake, i janë afruar dhe kanë hapur zjarr në drejtimin e tij. Plumbat rezultuan fatalë në vendngjarje.
Dëshmitarët pohojnë se autorët janë larguar me shpejtësi pasi janë siguruar që biznesmeni kishte ndërruar jetë. Zona u rrethua menjëherë nga policia, e cila ngriti pika kontrolli në të gjitha akset hyrëse e dalëse të qytetit për të bërë të mundur kapjen e tyre.
Disa persona janë shoqëruar për të sqaruar rrethanat, ndërsa motivi i atentatit mbetet ende i paqartë. Hetimet vijojnë intensivisht, ndërsa pritet që policia të publikojë detaje të reja mbi dinamikën dhe autorët e mundshëm të krimit.