Është zbardhur ekspertiza kriminalistike për ngjarjen e rëndë në Orosh, ku Hamza Uka dhe Julian Cumraku qëndruan të ngujuar për orë të tëra brenda një banese, nga ku u qëllua me armë zjarri. Pas të shtënave, Uka mbeti i plagosur, ndërsa detajet e ekspertëve hedhin dritë mbi dinamikën e incidentit.
Sipas raportimeve, ekspertët kanë konstatuar mbetje baruti në duart dhe rrobat e Hamza Ukës, duke sugjeruar se ai ka qenë në kontakt të drejtpërdrejtë me armë zjarri. Një plumb i qëlluar nga brenda banesës është sekuestruar edhe pas vetëdorëzimit të Ukës dhe Cumrakut.
Ndërkohë policia ende nuk ka dhënë një version zyrtar për mënyrën se si u plagos Erzen Uka, i cili u shoqërua për mjekim në spitalin e Shkodrës me një plagë në këmbën e djathtë.
Janë sekuestruar gjithashtu kamerat e sigurisë në Fushë-Arrëz, ku janë parë Uka, Cumraku dhe një person i tretë ende i paidentifikuar, që dyshohet t’i ketë ndihmuar. Në pyetje është marrë edhe vajza me të cilën Cumraku ishte takuar pak para ngjarjes, por detajet ende nuk janë bërë publike.
Pavarësisht se në banesë u gjetën armë, municione dhe një flamur i ISIS-it, Prokuroria ka zyrtarizuar deri tani vetëm akuzën e armëmbajtjes pa leje ndaj Ukës dhe Cumrakut. Objektivi i tyre dhe arsyeja e qëndrimit në banesë mbeten të paqarta, ndërsa hetimet vijojnë.