Tirana po përjeton një nga netët më të tensionuara të javëve të fundit. Pas tubimit disaorësh në qendër të kryeqytetit, mijëra protestues kanë nisur marshimin drejt Rinasit, duke shkaktuar bllokime të forta të qarkullimit në një nga akset më të rëndësishme të vendit.
Kolonat e gjata të qytetarëve po lëvizin nën thirrjet kundër qeverisë, ndërsa trafiku në disa segmente është paralizuar. Pamjet që vijnë nga terreni tregojnë një fluks të pazakontë njerëzish që vijojnë marshimin edhe gjatë orëve të vona të natës.
Forca të shumta policie janë vendosur përgjatë itinerarit për të monitoruar situatën dhe për të shmangur përshkallëzimin e tensioneve.
Protesta, që prej ditësh ka mbledhur qytetarë nga Tirana dhe rrethet, po hyn në një fazë të re, me organizatorët që paralajmërojnë se presioni ndaj qeverisë do të vazhdojë.
Ndërkohë, drejtuesit e mjeteve janë këshilluar të shmangin lëvizjen në segmentet e prekura nga marshimi, pasi qarkullimi po zhvillohet me vështirësi të mëdha.
Pamjet e publikuara në rrjetet sociale tregojnë turma që shtrihen për qindra metra, ndërsa thirrjet e protestuesve dëgjohen në të gjithë aksin ku po zhvillohet marshimi.
“Tirana nuk fle sonte”, ishte një nga sloganet që dominoi marshimin, teksa kolona e protestuesve vijon lëvizjen drejt Rinasit.