Një ngjarje e rëndë kriminale ka tronditur Athinën, ku një 26-vjeçar afgan po përballet me akuza të rënda për vrasjen e një 38-vjeçareje britanike dhe fshehjen e trupit të saj në një valixhe. Versioni hetimor i autoriteteve greke flet edhe për një përpjekje të dyshuar për të devijuar gjurmët e krimit përmes mesazheve mashtruese.
Akuza për vrasje dhe fshehje të trupit
Sipas mediave greke dhe dokumenteve hetimore, Sharif Ahmadzai dyshohet se vrau Elisabeth-Jane Ross, 38 vjeçe, shtetase britanike nga Skocia, dhe më pas e fshehu trupin e saj në një valixhe brenda një ndërtese të braktisur në zonën e Kypselit, në Athinë.
26-vjeçari, i njohur edhe si kampion boksi në Greqi, pritet të dalë para gjykatës në Athinë, ku përballet me akuza për vrasje, grabitje dhe armëmbajtje pa leje.
Mesazhe për familjarët dhe pista e rreme që po hetohet
Sipas dosjes hetimore, pas krimit i dyshuari përdori fillimisht telefonin e viktimës për t’u dërguar mesazhe familjarëve dhe miqve të saj, përpara se ta fikte pajisjen.
Më pas, sipas versionit të policisë greke, ai bleu një telefon tjetër dhe u dërgoi mesazhe disa personave, mes tyre edhe bashkëshortes së tij, duke u paraqitur si një xhihadist anonim. Në këto mesazhe pretendohej se 38-vjeçarja ishte vrarë për shkak të besimit të saj të krishterë.
Hetuesit dyshojnë se kjo ishte një përpjekje për të çorientuar autoritetet dhe për të fshehur autorin e vërtetë të krimit.
Dyshimet për para të tërhequra nga llogaritë e viktimës
Dosja hetimore përfshin edhe pretendimin se Ahmadzai mori kartat bankare të viktimës dhe tërhoqi mijëra euro nga llogaritë e saj pas vrasjes.
Pamjet e kamerave të sigurisë, sipas hetuesve, tregojnë një person që i ngjan atij duke tërhequr para në bankomate me kartat e 38-vjeçares. Të njëjtat pamje, sipas autoriteteve, e fiksojnë duke shtyrë një valixhe të madhe në rrugët e Kypselit, pranë vendit ku më vonë u gjet trupi. Hetuesit besojnë se viktima ndodhej brenda saj.
Roli i bashkëshortes në zbardhjen e rastit
Një rol kyç në zbardhjen e ngjarjes, sipas hetuesve, ka pasur bashkëshortja e tij, Alaina Hall, shtetase amerikane, me të cilën drejtonte një organizatë jofitimprurëse në Athinë për ndihmën ndaj refugjatëve.
Ajo u bë dyshuese në orët e para të 16 korrikut, kur vuri re se i shoqi nuk ndodhej në banesë. Përmes aplikacionit “Find My Friends”, ajo gjurmoi vendndodhjen e tij pranë apartamentit ku banonte viktima.
Hall u ka deklaruar hetuesve se bashkëshorti i dha 2.550 euro dhe një telefon të ri iPhone 17 Pro, për të cilat ajo dyshonte se ishin blerë me paratë e përfituara nga llogaritë bankare të Elisabeth-Jane Ross.
Kush janë personat në qendër të çështjes
Sipas mediave britanike, Ahmadzai kishte mbërritur në Greqi në vitin 2016, pasi kishte kaluar përmes Pakistanit, Iranit dhe Turqisë. Në kampin e emigrantëve në Moria ai u njoh me Alaina Hall, e cila punonte si vullnetare.
Ai ishte konvertuar në fenë e krishterë në vitin 2017 dhe çifti ishte martuar në prill 2023. Së bashku kishin themeluar organizatën “Love Every Nation”, e cila ndihmonte refugjatët në Athinë.
Ahmadzai ishte gjithashtu boksier profesionist dhe në mars kishte fituar titullin kampion të Greqisë në kategorinë super të lehtë. Ndërkohë, Elisabeth-Jane Ross kishte mbërritur në Athinë më 26 qershor për aktivitete vullnetare me organizata bamirëse, angazhim që e kishte ndjekur prej vitesh. Trupi i saj u gjet më 18 korrik.
Vdekja e 38-vjeçares ka tronditur komunitetin e vullnetarëve dhe besimtarëve të kishës “City on a Hill” në Edinburg, ku ajo ishte anëtare prej afro 20 vitesh.
Ndërsa çështja po kalon në gjykatë, shumë nga elementët më të rëndë të kësaj historie mbeten ende në filtrin e hetimit dhe të provave që do të shqyrtohen nga drejtësia greke.