Shtatë vatra zjarri mbeten ende aktive në disa qarqe të vendit, ndërsa bilanci i raportuar nga institucionet flet për 14 raste të regjistruara në 10 orët e fundit. Sipas versionit zyrtar, situata më e rënduar paraqitet në Mallakastër dhe në një pjesë të zonave malore në Gjirokastër, ku terreni dhe vegjetacioni po e bëjnë më të vështirë frenimin e flakëve.
Mallakastra mbetet pika më e nxehtë
Sipas Ministrisë së Mbrojtjes, vatrat aktive janë evidentuar në Riban dhe Ngraçan, në bashkinë Mallakastër, ku zjarri ka marrë përmasa dhe po punohet për të penguar afrimin e flakëve drejt zonave të banuara.
Në këtë operacion janë përfshirë mjete dhe forca nga disa bashki, 35 forca bashkiake, 40 efektivë të Forcave të Armatosura dhe avioni “Air Tractor” i Forcës Ajrore. Pesha e ndërhyrjes tregon se situata nuk është thjesht lokale, pavarësisht formulimeve qetësuese që zakonisht shoqërojnë raportimet zyrtare.
Dajt dhe Elbasan, vatra ende nën ndërhyrje
Në zonën e Dajtit vijon puna për shuarjen e zjarrit me angazhimin e shërbimeve zjarrfikëse, Administratës së Zonave të Mbrojtura, 50 efektivëve të Forcave të Armatosura dhe një helikopteri të Forcës Ajrore. Autoritetet deklarojnë se nuk ka rrezik për zonat e banuara.
Ndërkohë, në qarkun e Elbasanit mbeten aktive vatra në Shqiponjë, malin e Dardhës dhe në Mjekës. Sipas të dhënave zyrtare, zjarret në Shqiponjë dhe Mjekës janë vënë nën kontroll dhe nuk paraqesin rrezik për banorët, por ndërhyrjet në terren vijojnë.
Gjirokastra, terreni i vështirë po favorizon përhapjen e flakëve
Një nga pikat më delikate raportohet në zonën malore mes Stegopullit dhe Selckës, në bashkitë Libohovë dhe Dropull. Sipas autoriteteve, zjarri ka kaluar në majën e malit dhe ka shtuar intensitetin brenda një zone të mbrojtur, pa rrezikuar deri tani banesat.
Po ashtu, një zjarr me përmasa të mëdha ka përfshirë shpatin e Malit të Gjerë, mbi fshatin Levenisht, në vendin e quajtur Milava. Drejtoria e Mbrojtjes nga Zjarri dhe Shpëtimit në Gjirokastër thotë se terreni i thyer dhe bimësia e dendur po favorizojnë përhapjen e flakëve në sipërfaqe të tjera.
Bilanci zyrtar i angazhimit në terren
Në Penkovë të bashkisë Selenicë, zjarri është shuar plotësisht pasi preku rreth 2 hektarë pyll me pisha dhe 40 automjete të braktisura. Në Gumenicë vijon puna për shuarjen e një vatre me shkurre, ndërsa në Vërzhezhë të Skraparit situata, sipas raportimeve zyrtare, është vënë nën kontroll.
Për menaxhimin e situatës në rang vendi janë angazhuar 29 automjete zjarrfikëse, 246 forca operacionale, 90 efektivë të Forcave të Armatosura, një helikopter dhe një avion “Air Tractor”. Agjencia Kombëtare e Mbrojtjes Civile dhe strukturat vendore po koordinojnë ndërhyrjet, ndërsa mbetet për t’u parë sa efektive do të jenë këto kapacitete përballë vatrave që vijojnë aktive.
Bilanci i deritanishëm tregon se zjarret nuk janë izoluar ende plotësisht, sidomos në zonat me terren të vështirë dhe mbulim të dendur bimor.
Pavarësisht deklaratave se në disa pika nuk ka rrezik për banorët, zhvillimi i shpejtë i flakëve në Mallakastër dhe Gjirokastër e mban situatën në nivel të lartë shqetësimi.