Paraditen e sotme një lajm i trishtueshëm mbuloi estradën e humorit dhe jo vetëm.
Ndërron jetë mjeshtri i madh i humorit Gëzim Kruja. Ai prej kohësh ishte në gjendje jo të mirë shëndetësore dhe kohët e fundit e kishte të pamundur të fliste për shkak të sëmundjes. Dalja e tij e fundit për media ishte ajo në festën e 80-vjetorit të lindjes që miqtë e teatrit i organizuan.
Gëzim Kruja ka lindur në Shkodër, në vitin 1939.
Karrierën humoristike e ka nisur që në moshën 13-vjeçare.
Fillimet me Estradën amatore nisin që në kohën kur ishte ushtar më 1958.
Më pas vazhdon aktivizimin në vitin 1960 me Estradën profesioniste të Shkodrës.
Gëzim Kruja ka mbaruar në vitin 1979 Institutin e Lartë Pedagogjik, dega e Gjuhës dhe Letërsisë në Shkodër.
Ai kaloi një jetë në skenën shkodrane të humorit, në të cilat ka shkruar 15 komedi, 10 recitate, 2 libra me monologë gazmor.
Ka interpretuar mbi një mijë role në skeçe të ndryshme dhe ka 52 vite që ushtron profesionin e humoristit.
Në vitin 2004 ka marrë titullin “Krenaria e Qytetit”.
Në vitin 2005 merr titullin “Naim Frashëri i Artë” dhe në vitin 2010 titullin “Mjeshtër i Madh”.
Stafi i Aktualitet.al i shpreh ngushullimet më të sinqerta familjes së aktorit të pazëvendësueshëm të humorit.