Conad në Shqipëri: Skandal me Ushqime të Mykura dhe Çmime Abuzive – Denoncimi i Gazetarit Klodian Tomorri

0

Siguria ushqimore në Shqipëri është zyrtarisht në krizë. Një tjetër denoncim i rëndë vjen nga gazetari Klodian Tomorri, i cili ka publikuar me foto një produkt ushqimor të mykur, të blerë në supermarketin Conad, një nga rrjetet më të mëdha të tregtimit të ushqimeve në vend.

Produkt skandaloz me myk dhe çmim dyfish më të lartë se në Itali

Tomorri bën fjalë për gjizën Valle Verde (ricotta), e cila ndonëse kishte datë skadence më 12 maj, ishte e mbuluar me vatra të dukshme myku, vetëm disa ditë pas blerjes së saj më 26 mars në filialin pranë Ministrisë së Drejtësisë. Skandali nuk ndalet vetëm tek siguria, por thellohet edhe më tej me abuzimin e çmimit: 499 lekë në Shqipëri kundrejt 2.75 eurove në Itali.


Reagimi i plotë i Klodian Tomorrit (i pacensuruar):

Zhvates dhe të pashpirt.
Kjo është gjiza Valle Verde e Conadit. Ose ricotta si i thonë italianët.
E blerë më datë 26 mars, para një jave dmth, tek Conadi tek Ministria e Drejtësisë.
Data e skadencës thotë 12 maj, një ditë pas zgjedhjeve.
Katër vatra myku ka. Sa e hapa. Katër vatra myku tej e tej.
Këta mirë që janë të babëzitur, por janë dhe të pashpirt.

Pse të babëzitur?
Çmimi që e shet Conadi këtu është 499 lekë.
Pasi pashë mykun dhe çmimin, nisa të kontrolloj për kuriozitet me sa shitet në Itali kjo.
Çmimi në Itali për të njëjtin produkt është 2.75 euro ose dy herë më pak se sa e shet Conadi këtu.

Kanë kosto të mëdha këtu ndaj.
Paguajnë taksa më të larta se në Itali, u japin punëtorëve rroga më të larta se në Itali.
Dmth Conadi edhe të rrjep edhe të helmon.

Tani, unë jam i ndërgjegjshëm që pronari apo drejtori i Conadit nuk janë brenda tasit, që ta shohin se gjiza ka myk.
Por ka vetëm dy arsye se pse ajo është mykur para datës së skandencës:
Ose është ruajtur keq, ose i është ndërruar data e skadencës.
Një histori për të cilën në Shqipëri kemi dëgjuar dhe parë shpesh.

Megjithatë, këta janë dhe interesantë se kam dëgjuar një rast, që dikush kishte ngritur të njëjtin shqetësim dhe e hodhën në gjyq.
Dmth ose ha mykun dhe rri urtë ose po u ankove të çojmë në gjyq.

Siguria ushqimore në këtë vend është një tmerr i madh.
Gjiza me myk.
Pulat me salmonelë.
Luleshtrydhet me pesticide.
Mandarinat me helme.
Dhe larot bëjnë fitime me jetët e njerëzve.

Po duro milet sa të marrim atë pasaportën e BE-së…


Sistemi i dështuar i kontrollit ushqimor

Përtej supermarketit, gazetari e përqendron përgjegjësinë edhe te Autoriteti Kombëtar i Ushqimit (AKU), të cilin e akuzon si një strukturë të korruptuar që mbron bizneset dhe jo qytetarët, duke vepruar më shumë si “shoqatë taksidarësh” sesa si mbrojtëse e interesit publik.

Ky rast i ricottës me myk vjen pas një sërë denoncimesh për mish pule me salmonelë, fruta me pesticide dhe ushqime të kalbura, që vazhdojnë të qarkullojnë në treg pa asnjë ndërhyrje efektive nga institucionet.


Artikulli i mëparshëmStadium i Ri Me Kulla në “Selman Stërmasi” – Nikolin Jaka, Alban Peza Dhe Vilson Ahmeti Marrin Ndërtimin
Artikulli i radhësSkandal në Tiranë – Polici Pa Uniformë Tërheq Zvarrë Kreun e Partisë Balli Kombëtar, Adriatik Alimadhi