Kryetari i Partisë Demokratike, Sali Berisha, ka shpallur një platformë të re ekonomike gjatë një konference për shtyp, duke premtuar rritje automatike të pagave me 13% dhe ulje të ndjeshme të çmimeve të banesave si pasojë e reformës fiskale që synon të zbatojë nëse merr drejtimin e qeverisë pas zgjedhjeve të 11 majit.
Në qendër të premtimeve qëndron reduktimi drastik i tatimeve që rëndojnë aktualisht mbi qytetarët dhe bizneset:
- Tatimi mbi pagat do të ulet në 10% nga 23% që është aktualisht.
- Tatimi mbi të ardhurat jo nga pagat do të ulet nga 15% në 10%.
- Biznesi i vogël pa TVSH deri në 180 mijë euro xhiro vjetore.
- Taksa e transferimit të pronës do të ulet nga 15% në 2%.
- Taksa e ndikimit në infrastrukturë do të bjerë nga 8% në 2%.
Sipas Berishës, këto masa do të kenë një efekt zinxhir që do të çojë drejtpërdrejt në uljen e çmimeve të apartamenteve, një nga shqetësimet kryesore të qytetarëve në dekadën e fundit.
“Do të ulim taksat që rëndojnë mbi ndërtimin dhe pronën. Çmimi i shtëpive do të ulet ndjeshëm dhe bëhet më i përballueshëm për të rinjtë,” – tha Berisha, duke nënvizuar se përmes reduktimit të barrës fiskale do të krijohen kushte më të favorshme për investime dhe përballueshmëri të banesave.
Ai gjithashtu premtoi se në tre muajt e parë të qeverisjes do të nisë zbatimi i këtyre masave, duke kthyer fondet te qytetarët dhe duke ndalur “sistemin e grabitjes aktuale fiskale”.