Analisti Enton Abilekaj kritikoi me tone të forta SPAK-un, duke e akuzuar për shërbim politik ndaj qeverisë. Në një dalje në emisionin “Të Paekspozuarit”, Abilekaj denoncoi hetimin e kontratës 6 milionë dollarëshe të lobimit të Partisë Demokratike në SHBA si një veprim të diktuar politikisht.
“Dalja e SPAK-ut të dielën: Akt i shëmtuar politik!”
“Nuk ka asnjë shkelje ligjore në këtë rast. Partia politike deklaron shpenzimet pranë KQZ-së në fund të vitit, dhe vetëm pas kësaj mund të nisin hetimet. SPAK që del të dielën për të hetuar opozitën, është skandal dhe përdorim i ndyrë i një prokurorie politike,” tha Abilekaj.
Ai i quajti prokurorët që morën pjesë në këtë hetim “bashibozukë pa dinjitet në shërbim të Ramës”, duke theksuar se nuk kishte asnjë indicie konkrete për të justifikuar ndërhyrjen emergjente të organit të akuzës.
SPAK i akuzuar për drejtësi të njëanshme
Sipas Abilekajt, SPAK-u po shndërrohet në një vegël të fushatës së mazhorancës, duke vepruar me dy standarde. Ndërkohë që lë pa prekur kontratat e errëta të qeverisë, përfshirë marrëveshjen 16 milionë stërlina me Tony Blair, SPAK nxiton të godasë opozitën për çështje ende të pa verifikuara.
A është kthyer drejtësia në një armë politike?
Deklaratat e forta të Abilekajt rikthejnë edhe një herë në vëmendje dilemën që po trondit besimin qytetar ndaj drejtësisë së re:
- Pse SPAK heton me urgjencë opozitën dhe injoron aferat qeveritare?
- Pse ligji aplikohet në mënyrë selektive?
- Kush po kontrollon realisht drejtësinë në Shqipëri?
Në një klimë politike të tensionuar dhe me një sistem drejtësie që perceptohet gjithnjë e më shumë si i kapur, hetimi ndaj PD-së pa prova konkrete përbën një tjetër akt të rëndë të përdorimit politik të institucioneve të drejtësisë.
Për Enton Abilekajn dhe për shumë qytetarë, SPAK ka humbur një tjetër betejë për dinjitetin e vet.