Policia e Shtetit ka publikuar pamjet e arrestimit të Ragip Gilës, 28 vjeç, i dyshuar si autori i masakrës së ndodhur në lagjen “Qemal Stafa” në Shkodër, ku mbetën të vrarë 2 persona dhe u plagosën 2 të tjerë.
Në video shihet momenti kur forcat speciale ndërhyjnë dhe vënë në pranga Gilën, i cili sipas autoriteteve kishte qëlluar me armë zjarri ndaj kundërshtarëve të tij. Arrestimi është kryer pas një operacioni të shpejtë dhe të koordinuar nga DVP Shkodër, Forcat “Shqiponja” dhe Patrulla e Përgjithshme, nën drejtimin e Prokurorisë.
Çfarë u gjet gjatë kontrollit
Gjatë operacionit u sekuestruan:
- 2 armë zjarri (1 automatik dhe 1 pistoletë me fishek në fole)
- 1 jelek antiplumb
- 1 maskë dhe 1 skafandër
- 1 shishe 1.5 litra e mbushur me lëndë djegëse
Akuzat ndaj Gilës
Shtetasi Ragip Gila akuzohet për:
- Vrasje në rrethana të tjera cilësuese
- Vjedhje me armë
- Shkatërrim prone
- Mbajtje pa leje e armëve dhe municionit
- Prodhim i armëve dhe eksplozivëve
Pamjet e bëra publike nga policia i japin një tjetër dimension ngjarjes që ka tronditur Shkodrën dhe kanë ndezur debatin mbi sigurinë dhe fuqinë e grupeve kriminale në qytet.