Bordi i Transparencës ka ndërhyrë sërish në tregun e karburanteve, duke vendosur çmime të reja tavan për naftën dhe benzinën. Sipas njoftimit zyrtar, ndryshimet hynë në fuqi më 9 maj në orën 14:00 dhe do të mbeten në fuqi deri në mbledhjen e ardhshme të bordit.
Çmimet e reja të shpallura nga bordi
Sipas vendimit të datës 9 maj 2026, çmimi me pakicë i gazoilit të standardit SSH EN 590 është caktuar jo më shumë se 197 lekë për litër. Për shitjen me shumicë, tavani është vendosur në 185 lekë për litër.
Për benzinën, sipas të njëjtit vendim, çmimi me pakicë është përcaktuar jo më shumë se 182 lekë për litër, ndërsa çmimi me shumicë jo më shumë se 170 lekë për litër.
Vendimi hyn në fuqi menjëherë
Sipas njoftimit zyrtar, çmimet e reja hynë në fuqi më 9 maj në orën 14:00. Ato do të mbeten të vlefshme deri në një vendimmarrje të re të Bordit të Transparencës, ku pritet të reflektohen lëvizjet e ardhshme të tregut.
Bordi u ka tërhequr vëmendjen operatorëve të shitjes me pakicë dhe shumicë për detyrimin e zbatimit të vendimit.
Paralajmërimi për operatorët
Në versionin zyrtar thuhet se, në rast shkeljesh të konstatuara nga operatorë të ndryshëm, do të aplikohet pezullimi i aktivitetit.
Po sipas njoftimit, Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë pretendojnë se janë të angazhuara për mbrojtjen e interesave të konsumatorëve dhe konkurrencës në treg.
Çfarë ndodh me akcizën
Në sqarimin që shoqëron vendimin, bordi i referohet Aktit Normativ nr. 1, datë 3.4.2026, sipas të cilit niveli 80% i akcizës zbatohet vetëm kur çmimi me pakicë i gazoilit kalon 220 lekë për litër ose kur benzina kalon 200 lekë për litër.
Meqë çmimet e shpallura këtë herë janë nën këto kufij, sipas metodologjisë së përmendur në njoftim, akciza do të zbatohet e plotë, në nivelin 100%.
Vendimi i radhës konfirmon se çmimet e karburanteve vijojnë të përcaktohen përmes ndërhyrjes administrative, ndërsa konsumatorët përballen sërish me ndryshime të shpallura nga bordi.
Për momentin, çmimet tavan të vlefshme janë 197 lekë për litër për naftën dhe 182 lekë për litër për benzinën.