Kur një zyrtare e akuzuar nga SPAK për përfshirje në manipulim tenderësh me miliona euro del në “prime time”, publiku pret përgjigje. Pret transparencë. Pret përballje me faktet. Por ajo që shqiptarët panë mbrëmjen e së enjtes ishte diçka krejt tjetër: një spektakël emocional i ndërtuar për të pastruar figurën e Mirlinda Karçanajt, jo për të sqaruar akuzat ndaj saj.
Në vend të pyetjeve mbi 12 tenderat nën hetim, lidhjet me Ergys Agasin, dyshimet për favorizime, pastrim parash apo mënyrën sesi miliona euro publike kalonin në një sistem të mbyllur klientelist, publiku mori histori për shtëpi me qira, sakrifica personale dhe lot në studio.
Në një vend normal, një figurë e akuzuar për “grup të strukturuar kriminal” do të përballej me dokumente, kontradikta dhe pyetje të forta. Në Shqipëri, mjafton një studio televizive, disa pyetje të buta dhe një regji emocionale për të tentuar transformimin e një dosjeje penale në histori viktimizimi.
Pikërisht këtu nis problemi real. Jo vetëm te Karçanaj, por te mekanizmi që përpiqet të normalizojë skandalin. Prej vitesh AKSHI u shit si simbol i modernizimit dhe revolucionit digjital, ndërsa sot shumë nga kontratat e saj ndodhen nën hijen e hetimeve të SPAK. Dhe megjithatë, në vend të reflektimit publik, prodhohet propagandë emocionale.
Shqiptarëve nuk u intereson nëse një zyrtare ka makinë apo jo. Pyetja është shumë më e thjeshtë: si u menaxhuan paratë publike? Kush përfitoi? Kush vendoste? Kush garantonte tenderët? Dhe pse kaq shumë emra të lidhur me AKSHI-n po dalin sot në dosje hetimore?
Intervista la pas një ndjesi të qartë: jo gazetari, por menaxhim imazhi. Një përpjekje për të zëvendësuar llogaridhënien me emocione televizive. Por lotët në ekran nuk fshijnë akuzat në dosje.
Sepse në fund, problemi nuk është vetëm një ish-drejtoreshë. Problemi është kultura e pandëshkueshmërisë që për vite ndërtoi një sistem ku propaganda shitej si sukses dhe ku çdo pyetje kritike konsiderohej sulm.
Dhe pikërisht për këtë arsye, publiku sot kërkon më shumë se intervista të kuruara. Kërkon përgjigje.