Një raportim i gazetës britanike The Telegraph ngre sërish pikëpyetje serioze mbi filtrat e sistemit të azilit dhe shtetësisë në Mbretërinë e Bashkuar. Sipas këtij versioni, Sokol Hoxha, i arrestuar pak ditë më parë në SHBA pas afro tre dekadash në arrati, kishte arritur të siguronte azil dhe më pas shtetësi britanike duke përdorur identitet të rremë.
Raporti: u paraqit si shqiptar i Kosovës
Sipas The Telegraph, 50-vjeçari u kamuflua si shqiptar i Kosovës dhe në këtë mënyrë përfitoi fillimisht azil në Britani e më pas shtetësinë britanike. Gazeta britanike e paraqet rastin si një shembull të përdorimit të identiteteve të rreme për të hyrë dhe qëndruar në MB.
paragraphs
Kërkohej për tre vrasje, u arrestua në Ohio
Në material thuhet se Hoxha ishte në kërkim për tre vrasje: dy vëllezër të vrarë në Patos në vitin 1997 dhe bashkëshorten e tij 19-vjeçare në Belgjikë, po atë vit. Për vrasjen e dyfishtë në Shqipëri ai ishte dënuar në mungesë me 25 vite burg.
Sipas autoriteteve amerikane, arrestimi i tij në Kettering të Ohajos erdhi pas një hetimi gjashtëvjeçar të shtrirë në dy kontinente, në koordinim me Interpol Washington dhe agjenci të tjera vendase e ndërkombëtare. Versioni zyrtar amerikan thotë se ai kishte marrë identitet të rremë pasi u largua nga Belgjika dhe më pas kishte siguruar shtetësi në një vend tjetër europian nën pseudonim.
Nga Britania në SHBA, nën të njëjtin pseudonim
Sipas raportimit, Hoxha udhëtoi në SHBA në vitin 2012 duke përdorur të njëjtin emër të rremë dhe arriti të marrë edhe statusin e qëndrimit të përhershëm të ligjshëm, ndërsa fshehte identitetin e tij real. Autoritetet amerikane pretendojnë se ai e mbajti të fshehtë këtë identitet për 14 vjet të tjera.
The Telegraph shkruan se në hetimin gjashtëvjeçar kanë qenë të përfshira edhe Agjencia Kombëtare e Krimit dhe Home Office në Britani, për të gjurmuar lëvizjet dhe statusin e tij të emigracionit pasi kishte jetuar atje për të paktën një dekadë.
Jo rast i izoluar, sipas gazetës britanike
Artikulli përmend edhe raste të tjera shqiptarësh që, sipas gazetës, kanë marrë dokumente britanike duke përdorur identitete të rreme dhe duke u paraqitur si refugjatë nga Kosova. Mes emrave të përmendur janë Avni Metra, Arsim Murati, Afrim Sinani dhe Ilir Kumbaro.
Raportimi i The Telegraph i vendos këto raste në të njëjtin kuadër: dobësi në verifikim, përdorim pseudonimesh dhe procese të gjata ligjore që në disa raste kanë përfunduar me ekstradim, e në raste të tjera jo.
Rasti i Sokol Hoxhës pritet të rikthejë debatin mbi mënyrën si janë verifikuar identitetet në procedurat e azilit dhe shtetësisë në Britani, sidomos në vitet e luftës në Kosovë dhe pas saj.
Për momentin, shumica e detajeve mbi rrugën që ai ndoqi për të marrë dokumentet britanike mbështeten te raportimi i The Telegraph dhe te deklarimet e autoriteteve amerikane. Pyetja që mbetet është sa gjatë mund të kalojë pa u vënë re një identitet i rremë, kur pas tij fshihet një person i kërkuar për krime të rënda.