Për atë që ndodhi në Zvërnec, sot duhet të japin dorëheqjen Drejtori i Përgjithshëm i Policisë së Shtetit, Skënder Hitaj, dhe Ministri i Brendshëm, Besfort Lamallari.
Pamjet e publikuara nga protesta tregojnë qytetarë që merren me forcë nga persona të maskuar, ndërsa Policia e Shtetit është e pranishme në terren. Në një shtet normal, askush përveç policisë nuk ka të drejtë të ushtrojë forcë për të ndaluar apo shoqëruar qytetarë.
Edhe në rast se protestuesit kanë hyrë në një pronë private, punonjësit e sigurisë private nuk kanë kompetenca të veprojnë si forcë policore. Detyra e tyre është të njoftojnë Policinë e Shtetit, ndërsa ndërhyrja dhe çdo veprim kufizues ndaj qytetarëve duhet të kryhet vetëm nga organet ligjzbatuese.
Ajo që u pa në Zvërnec ngre pikëpyetje serioze mbi aftësinë e shtetit për të kontrolluar territorin dhe për të ushtruar monopolin e ligjshëm të forcës. Kur njerëzit me maska veprojnë dhe policia shikon, kufiri mes autoritetit shtetëror dhe arbitraritetit fillon të zbehet.
Përgjegjësia për këtë situatë nuk bie vetëm mbi personat që ushtruan forcën. Ajo bie edhe mbi drejtuesit e institucioneve që kishin detyrimin ta parandalonin.
Skënder Hitaj dhe Besfort Lamallari duhet të japin një shpjegim publik për atë që ndodhi. Nëse Policia e Shtetit nuk është më institucioni që kontrollon territorin dhe garanton zbatimin e ligjit, atëherë kemi të bëjmë me një problem shumë më të madh se një incident proteste.
Dhe kur një problem i tillë ndodh para syve të gjithë vendit, përgjegjësia politike nuk mund të shmanget me heshtje. Dorëheqja mbetet akti minimal i llogaridhënies.