Shifrat zyrtare flasin për 13 vatra zjarri në të gjithë vendin, ndërsa 10 prej tyre vijojnë të jenë aktive. Pikat më problematike mbeten Lura e Dibrës dhe zona e Dajtit në Tiranë, ku flakët kanë vazhduar prej ditësh pavarësisht angazhimit të forcave në terren dhe ndërhyrjes nga ajri.
Lura, zona më e goditur nga zjarri
Sipas të dhënave zyrtare, situata më e rënduar paraqitet në Lurë, ku operacioni po vijon me 200 forca bashkiake, 50 efektivë të ushtrisë, 15 punonjës të Policisë së Shtetit, 18 vullnetarë, 2 automjete zjarrfikëse dhe 2 avionë Air Tractor.
Ndërhyrja ka bërë të mundur vendosjen nën kontroll të segmentit pranë banesave, por bilanci i deritanishëm mbetet i rëndë: në katër ditë janë djegur 300 hektarë pyje.
Vatër aktive edhe në Bulqizë-Selishtë
Aktive mbetet edhe vatra në Qafë Helmes, në aksin Bulqizë-Selishtë. Sipas autoriteteve, forcat operacionale kanë arritur të kontrollojnë një pjesë të saj, por zjarri nuk është shuar plotësisht.
Dajti në presion, ndërhyrje edhe në Priskë dhe Farkë
Në Tiranë, puna po vijon në Malin e Dajtit me 9 forca zjarrfikëse dhe 2 helikopterë të Forcave të Armatosura. Ndërkohë, në zonat e Priskës dhe Farkës janë angazhuar 30 forca zjarrfikëse me 6 mjete.
Pavarësisht këtij mobilizimi, vatrat në këto zona vazhdojnë të mbeten problematike, çka ngre edhe një herë pikëpyetje mbi efektivitetin e reagimit në terren kur zjarret zgjasin për disa ditë.
Ministria raporton 10 vatra aktive në shkallë vendi
Ministria e Mbrojtjes njofton se në rang kombëtar po ndiqen 13 vatra zjarri, nga të cilat 10 janë ende aktive. Sipas versionit zyrtar, ndërhyrja nga toka dhe ajri ka bërë të mundur vënien nën kontroll të situatës në Krujë, ku po punohet për izolimin dhe shuarjen e plotë të vatrave.
Vatra aktive, por pa rrezik të menjëhershëm për zonat e banuara, raportohen edhe në Gjirokastër, Lezhë, Elbasan dhe Shkodër. Në Përmet dhe në Qukës, reshjet e shiut po ndihmojnë në përmirësimin e situatës.
Pamja e përgjithshme mbetet shqetësuese: disa nga vatrat më të mëdha vijojnë prej ditësh, ndërsa dëmet në sipërfaqe pyjore tashmë janë të konsiderueshme.
Përtej bilancit ditor të raportuar nga institucionet, zjarret po nxjerrin sërish në pah cenueshmërinë e zonave pyjore dhe varësinë e madhe nga ndërhyrjet emergjente dhe kushtet e motit.