Një gjykatë në Paris ka dhënë 9 vite burg për të riun e konsideruar organizatori kryesor i grabitjes së futbollistit Gianluigi Donnarumma dhe partneres së tij, një ngjarje që tronditi opinionin jo vetëm për vlerën e madhe të sendëve të marra, por sidomos për dhunën e ushtruar ndaj gruas shtatzënë.
Vendimi i gjykatës në Paris
Ilyas Kherbouch, 21 vjeç, u dënua me 9 vite burg dhe 80 mijë euro gjobë për rolin e tij në sulmin ndaj Donnarummës dhe Alessia Elefante, në apartamentin e tyre në Paris më 21 korrik 2023.
Sipas vendimit të gjykatës, ai u konsiderua personi që qëndronte pas organizimit të grabitjes. Ndërkohë, një tjetër i akuzuar, Khyan M., 22 vjeç, i cili sipas akuzës dyshohej se kishte koordinuar veprimet nga burgu përmes telefonit, u shpall i pafajshëm.
Si ndodhi sulmi në banesë
Ngjarja ndodhi në apartamentin e çiftit në zonën e Avenue Montaigne, ku grabitësit hynë nga një dritare pasi kishin arritur në çati me ndihmën e një shkalle.
Në atë periudhë, Donnarumma ishte portier i PSG-së. Sipas dëshmive të paraqitura në proces, futbollisti u godit në fytyrë me një tirashtyp dhe u kërcënua me thikë, ndërsa partnerja e tij u detyrua t’i çonte autorët te kasaforta.
Dhuna ndaj partneres shtatzënë
Sipas dëshmisë së Alessia Elefante, dhuna ndaj saj nuk u ndal edhe pasi u kishte treguar autorëve se ishte shtatzënë. Ajo ka deklaruar se u godit, u kërcënua dhe në një moment iu shtrëngua fyti me kabllon e karikimit të një telefoni.
Pak ditë pas grabitjes, ajo pësoi abort spontan. Gjatë shqyrtimit gjyqësor u vlerësua se tronditja e shkaktuar nga ngjarja mund të ketë ndikuar në humbjen e shtatzënisë, por gjykata nuk përcaktoi një lidhje të sigurt shkakësore.
Çfarë u mor dhe dënimet e tjera
Nga banesa e çiftit u morën sende me vlerë rreth 500 mijë euro. Rasti ka ngritur sërish pikëpyetje mbi sigurinë edhe në zonat më të mbrojtura të kryeqytetit francez, përballë grabitjeve të dhunshme që godasin figura publike.
Përveç Kherbouch, edhe Moktar D., i cilësuar si person që kishte ndihmuar në përgatitjen e grabitjes, u dënua me 5 vite burg.
Vendimi i Gjykatës së Parisit mbyll një pjesë të procesit penal, por jo peshën e një ngjarjeje që la pasoja të rënda për çiftin, përtej humbjes materiale.