Gjykata e Posaçme ka shpallur vendimin për shtatë të pandehurit e dosjes “Revanshi”, një çështje e hetuar nga SPAK dhe gjykuar me procedurën e gjykimit të shkurtuar. Në qendër të vendimit është edhe Durim Bami, i cili u dënua me 10 vjet e 8 muaj burg, ndërsa për secilin prej të pandehurve gjykata ka shpallur masa të ndryshme dënimi dhe në disa raste edhe pafajësi ose pushim të një pjese të akuzave.
Vendimi i GJKKO për shtatë të pandehurit
Sipas vendimit të shpallur nga GJKKO, të pandehur në këtë dosje janë Durim Bami, Altin Morina, Aldo Avdyli, Jozi Kraja, Henerigert Mitri, Oltion Zefi dhe Edison Jozvik. Çështja u shqyrtua me trup gjykues të përbërë nga gjyqtaret Alma Kodraliu, Engjëllushe Tahiri dhe Rudina Palloj.
Në versionin e shpallur nga gjykata, dënimet pas aplikimit të gjykimit të shkurtuar janë: Durim Bami 10 vjet e 8 muaj burg, Oltion Zefi 10 vite burg, Edison Jozvik 8 vite burg, Altin Morina 6 vjet e 8 muaj burg, Henerigert Mitri 5 vjet e 4 muaj burg, ndërsa Jozi Kraja dhe Aldo Avdyli nga 4 vjet e 8 muaj burg secili.
Akuzat kryesore që u pranuan nga gjykata
Sipas vendimit, Jozi Kraja dhe Aldo Avdyli u shpallën fajtorë për sigurim kushtesh dhe mjetesh materiale për të kryer vrasje, si edhe për pjesëmarrje në grup të strukturuar kriminal. Për të dy, në bashkim dënimesh u caktuan nga 7 vite burg, të zbritura në 4 vjet e 8 muaj për shkak të gjykimit të shkurtuar.
Oltion Zefi u shpall fajtor për trafikim narkotikësh dhe për organizim të grupit të strukturuar kriminal. Në bashkim dënimesh ai mori 15 vite burg, që u ulën në 10 vite. Edison Jozvik u shpall fajtor për trafikim narkotikësh dhe pjesëmarrje në grup të strukturuar kriminal, me dënim përfundimtar 8 vite burg pas uljes nga gjykimi i shkurtuar.
Henerigert Mitri u shpall fajtor për kultivim të bimëve narkotike, pjesëmarrje në grup të strukturuar kriminal dhe shpërdorim detyre. Në bashkim dënimesh, gjykata caktoi 8 vite burg, të reduktuara në 5 vjet e 4 muaj.
Çfarë vendosi gjykata për Durim Bamin
Për Durim Bamin, gjykata shpalli fajësi për sigurim kushtesh dhe mjetesh materiale për të kryer vrasje në dëm të shtetasit A.N, si edhe për krijim, drejtim apo organizim të grupit të strukturuar kriminal në lidhje me vepra kundër jetës. Ai u shpall gjithashtu fajtor edhe për kultivim të bimëve narkotike, si dhe për organizim të grupit të strukturuar kriminal në lidhje me këtë vepër.
Nga ana tjetër, për një tjetër episod të akuzës për sigurim kushtesh dhe mjetesh materiale për të kryer vrasje ndaj shtetasve T.Xh dhe E.M, GJKKO e deklaroi të pafajshëm. Në fund, në bashkim dënimesh, gjykata caktoi 16 vite burg, të reduktuara në 10 vjet e 8 muaj për shkak të gjykimit të shkurtuar.
Edhe Altin Morina me dënim, një akuzë u pushua
Sipas vendimit, Altin Morina u shpall fajtor për kultivim të bimëve narkotike, pjesëmarrje në grup të strukturuar kriminal dhe mbajtje pa leje të armëve në automjet. Në bashkim dënimesh ai u dënua me 10 vite burg, që u ulën në 6 vjet e 8 muaj me gjykim të shkurtuar.
Gjykata vendosi edhe pushimin e çështjes penale ndaj tij për një akuzë tjetër që lidhej me mbajtjen e municioneve luftarake pa leje. Po ashtu, u urdhërua konfiskimi në favor të shtetit i sendeve të sekuestruara që lidhen me këtë episod, përfshirë një armë zjarri pistoletë, një krehër pistolete dhe 7 fishekë.
Të gjitha dënimet janë parashikuar të kryhen në burg të sigurisë së lartë, ndërsa për disa prej të pandehurve llogaritja nis nga dita e arrestimit. Për Oltion Zefin, sipas vendimit, vuajtja e dënimit do të kryhet pasi të arrestohet për efekt ekzekutimi.
Vendimi i GJKKO mund të ankimohet në Gjykatën e Posaçme të Apelit për Korrupsionin dhe Krimin e Organizuar brenda 15 ditëve nga njoftimi.