Ish-presidenti i Kosovës, Hashim Thaçi, është shpallur fajtor nga Dhomat e Specializuara në Hagë dhe është dënuar me 25 vjet burgim për krime lufte. Sipas vendimit të shpallur në seancë, bëhet fjalë për një aktgjykim të shkallës së parë, çka do të thotë se çështja mbetet e hapur për apel.
Vendimi i shpallur në Hagë
Trupi gjykues e gjeti Thaçin penalisht përgjegjës për krime që përfshijnë vrasje, torturë, trajtim mizor dhe ndalim të paligjshëm, të kryera gjatë luftës në Kosovë.
Sipas gjykatës, krimet e konstatuara ishin të rënda dhe të përhapura gjerësisht. Në vendim përmenden 14 komuna të Kosovës dhe dy rrethe në veri të Shqipërisë.
Përgjegjësi penale edhe për tre ish-zyrtarë të tjerë
Në të njëjtin aktgjykim, trupi gjykues konstatoi se edhe Kadri Veseli, Rexhep Selimi dhe Jakup Krasniqi mbajnë përgjegjësi penale për krime lufte.
Sipas vendimit të shpallur, përgjegjësia e tyre lidhet me ndalimin arbitrar, trajtimin mizor, torturën dhe vrasjen e paligjshme.
Seanca u mbyll pas shpalljes së dënimeve
Pas leximit të aktgjykimit dhe dënimeve ndaj katër ish-krerëve të UÇK-së, seanca në Dhomat e Specializuara në Hagë u mbyll.
Vendimi i dhënë sot nuk është përfundimtar. Palët kanë të drejtë ta apelojnë, ndaj beteja ligjore pritet të vazhdojë edhe në hallkat e tjera të procesit.
Dënimi me 25 vite burg për Hashim Thaçin shënon një nga vendimet më të rënda të shpallura deri tani nga Dhomat e Specializuara për luftën në Kosovë.
Pesha politike dhe juridike e këtij aktgjykimi mbetet e madhe, por fjala e fundit nuk është thënë ende, pasi vendimi mund të ankimohet.