Protesta e shtatë në Tiranë, e nisur fillimisht nga revolta e studentëve dhe e zgjeruar më pas me pjesëmarrje qytetare, u kthye sërish në një ditë përplasjesh të forta në kryeqytet. Kulmi i tensionit u regjistrua me sulmin ndaj Gjykatës së Apelit dhe më vonë me incidentet pranë Ministrisë së Brendshme, ndërsa policia reagoi me gaz lotsjellës, ujë me presion dhe shoqërime.
Nga grumbullimi te tensioni i hapur
Protesta nisi paraditen nën masa të shtuara sigurie dhe me kontrolle policore në qendër të Tiranës. Në sheshin “Skënderbej” u kontrolluan çantat e disa të rinjve, ndërsa më pas protestuesit u grumbulluan para Ministrisë së Arsimit.
Në orët e para tubimi u zhvillua pa incidente të rënda, me këngë, valle dhe thirrje ndaj efektivëve. Por rreth orës 12:30 situata ndryshoi, kur disa protestues nisën të shkëpusnin pllaka dhe gurë nga trotuari, duke sinjalizuar kalimin nga grumbullimi simbolik te përplasja e hapur.
Gaz lotsjellës, ujë me presion dhe ndjekje në rrugët e kryeqytetit
Rreth orës 13:00, sipas versionit zyrtar, ndaj policisë u hodhën gurë dhe kapsolla. Përgjigjja e forcave të rendit erdhi me gaz lotsjellës dhe ujë me presion për të shpërndarë turmën pranë Ministrisë së Arsimit.
Përplasjet u zhvendosën më pas në Rrugën e Durrësit dhe te zona e “Kafe Flora”, ku policia kërkoi me megafon largimin e qytetarëve nga rruga dhe vijoi ndërhyrjen. Protestuesit tentuan të rigrumbulloheshin, por u shtynë drejt segmenteve të tjera të qytetit, përfshirë bulevardin “Dëshmorët e Kombit”.
Sulm ndaj Gjykatës së Apelit, dëmtohet godina
Rreth orës 14:00, tensioni mori një tjetër kthesë të rëndë kur një grup protestuesish të maskuar iu drejtua Gjykatës së Apelit në Tiranë. Sipas raportimeve nga vendngjarja, u thyen dyer dhe xhama me sende të forta, ndërsa një pjesë e tyre arriti të hyjë në ambientet e brendshme të institucionit.
Në godinë ndodheshin edhe punonjës në momentin e sulmit. Pamjet nga brenda treguan dëme materiale, ndërsa ngjarja ngriti sërish pikëpyetje serioze për aftësinë e institucioneve për të parandaluar depërtimin e grupeve të dhunshme në objekte të rëndësisë publike.
Policia flet për identifikime dhe arrestime
Pas sulmit ndaj Apelit, policia ndërhyri për shpërndarjen e grupeve dhe nisi shoqërime në disa zona të kryeqytetit. Sipas Policisë, për dëmtimin e dyerve dhe dritareve të Gjykatës së Apelit janë identifikuar 20 persona, nga të cilët pesë janë arrestuar dhe 15 të tjerë janë shpallur në kërkim.
Po sipas autoriteteve, është sekuestruar edhe një sasi lëndësh piroteknike. Deri në këtë fazë, shifrat dhe përgjegjësitë mbeten në nivelin e pretendimeve zyrtare, ndërsa dinamika e plotë e ngjarjes kërkon verifikim të plotë institucional.
Mbrëmja sjell sërish përplasje pranë Ministrisë së Brendshme
Për disa orë protestuesit qëndruan para Kryeministrisë pa konfrontim të drejtpërdrejtë me policinë. Megjithatë, rreth orës 18:00, me rifillimin e marshimit në bulevard, tensioni u rikthye pranë Ministrisë së Brendshme.
Sipas raportimeve, protestuesit u ndanë në dy grupe dhe goditën godinën me mjete piroteknike, ndërsa policia ndërhyri me autobotë për të shpërndarë turmën. Në zona të tjera të qytetit, përfshirë afër Medresesë dhe pas Muzeut, pati ndjekje mes policisë dhe protestuesve, ndërsa disa prej këtyre të fundit i vunë flakën kazanëve të mbeturinave për të ngadalësuar ndërhyrjen e forcave të rendit.
Para nisjes së protestës, kryeministri Edi Rama kërkoi dialog “pa kushte” dhe distancim nga dhuna, ndërsa Sali Berisha shprehu mbështetje politike për protestën dhe përsëriti kërkesën për largimin e qeverisë.
Tensione nuk u raportuan vetëm në Tiranë. Tubime dhe marshime u zhvilluan edhe në qytete të tjera, ndërsa në Kurbin pati përplasje dhe hedhje molotovësh drejt godinës së bashkisë, ku u raportuan flakë në hyrje.